Ձեր վստահելի աղբյուրը

Ապրիլի 1-ից  ֆիզիկական  անձանց կողմից անձնական օգտագործման ապրանքների համար սահմանված առցանց անմաքս առևտրի արտոնության շեմը  նվազեցվել է՝ նախկին 200 հազար դրամի և 31 կգ փոխարեն սահմանվել է 200 եվրո և 31 կգ արտոնության շեմը:

Քաղաքացիներն ահազանգում են, որ իրենք իրազեկված չեն եղել փոփոխությունների մասին և նախապես պատվիրված ապրանքներ ունեին, որոնք ստիպված են մաքսազերծել։ Մյուս կողմից էլ հայտնի իրողություն է, որ քաղաքացիները մեծ քանակությամբ առաջին անհրաժեշտության և մատչելի գներով գնումներ են կատարում արտասահմանյան առցանց հարթակներից և մաքսատուրքից խուսափելու համար ստիպված կլինեն հրաժարվել այդ շահավետ գնումներից։

Նոր մաքսային փոփոխությունները սպառողների շահերի տեսանկյունցի դիտարկելու համար Panorama.am-ը դիմեց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանին։

«Ըստ էության պետությունն անընդհատ խոսում է, որ աննախադեպ թվերով հարկեր է հավաքում և բյուջեի վիճակը ֆանտաստիկ լավ է, բայց մենք տեսնում ենք, որ բոլոր ուղղություններով, որտեղ տեսական շանս ունեն ավել հարկ հավաքելու և ավել մուտք ապահովելու՝ կառավարությունը գնում է այդ քայլերին։ ԸՆդ որում, սա ուղիղ քաղաքացուց վերցվող գումար է։ Ճիշտ է՝ կարգավորումը ԵԱՏՄ-ինն է, բայց չմոռանանք, որ հայկական կողմը որևէ առարկություն սրան չի ներկայացրել, ոչ ժամկետի ուշ լինելու, ոչ էլ այլ առումներով։ 

Լուրջ խնդիր էր, որ ՊԵԿ-ը շատ ուշ էր իրազեկել փոփոխությունների մասին։ Այն իրազեկումը, որ ՊԵԿ-ն արեց մի քանի օր առաջ, նորմալ էր, պետք է արվեր, բայց այն պետք է լիներ արդեն հիշեցման կարգով։ Այդ նույն տեքստը պետք է տված լիներ հունվար ամսին։ Ինչու հունվարին, որովհետև կա վիճակագրություն, թե ինչ ժամկետներում են էլեկտրոնային գնումները հասնում երկիր։ Ստացվում է այնպես, որ մարդիկ ապրանք են պատվիրել մի ժամանակահատվածում, երբ դե ֆակտո կարող էին պատվիրել 200 հազար դրամի, բայց ապրանքը երկիրը հատում է արդեն 200 եվրոյի հաշվարկով և ստացվում է, որ շատերը, ըստ էության, կարող էին այդ գնումը չկատարել, եթե իմանային, որ այդ ապրանքը մաքսազերծելու են։ Այսինքը ունենք իրավական խնդիր։

Առցանց առևտուրը սրանից հետո որոշակի փոփոխությունների կենթարկվի։ Բավական մեծ ծավալ էր կազմում նաև արտերկրից գնված ապրանքները, որոնց արժեքը գերազանցում էր 200 եվրոն։ Բնականաբար, հիմա մարդիկ պետք է ծանր ու թեթև անեն, հասկանան, թե արժի գնել, թե ոչ։ Մարդիկ ինչու էին այդ եղանակով ապրանքներ ձեռք բերում։ Որովհետև այն ինչ-որ տոկոսով ավելի էժան էր, քան մեր երկրում վաճառքը։ Էլեկտրոնային գնումն այդ իմաստով ունի առավելություն, որ էժան է և՝ թերություն, որովհետև մարդն ապրանքն առանց շոշափելու, վիզուալ զննելու է գնում, հեռավորության վրա է ապրանքը զննության ենթարկում և ընտրություն անում։ Եթե քաղաքացին 15 % էլ ինքը պետք է ավել գումար վճարի ապրանքի համար,  և գնային տարբերույունն էլ մեր երկրի հետ, օրինակ, 20 % է, ապա ինքը կմտածի այդ եղանակով գնել, թե ոչ»,-ասաց Պիպոյանը։