Ձեր վստահելի աղբյուրը

Այսօր Հայաստան է ժամանել Եվրոպայի խորհրդի գլխավոր քարտուղար Մարիա Պեյչինովիչ Բուրիչը։ ԱԳՆ դիմաց հասարակական, քաղաքական գործիչները բողոքի ակցիա իրականացրեցին՝  Հայաստանի քաղաքական բանտարկյալների և Բավքում գտնվող հայ գերիների ազատության պահանջով։

«Կառույց, որն այստեղ- այնտեղ բարձրաձայնում է  ժողովրդավարության, խոսքի ազատության, մարդու իրավունքների մասին,  անգամ չբարեհաճեցին  մի հատ նայել՝ տեսնելու, թե ովքեր են հավաքվել, ինչ փաստարկներով, ուղերձներով»,- ակցիայի ավարտից հետո լրագրողներին ասաց փաստաբան, իրավապաշտպան Ռուբեն Մելիքյանը։

Նա կարծում է, որ Եվրոպայի խորհուրդը արժեքային գահավիժման մեջ է գտնվում և այսօր համոզվել են դրանում։

«Տարիներ առաջ մանր-մունր, կարևոր հարցերին Եվրոպայի խորհուրդը միջատում էր՝ հայտարարություններ կատարում, բանաձևեր ընդունում։ Հիմա տեսնում ենք  քար լռություն Երևանի քաղբանտարկյալների, Բաքվի հայ քաղբանտարկյալների մասով։

Այս ակցիայի նպատակն էր ցույց տալ, որ մենք լուռ չենք»,- ասաց Մելիքյանը։

Նա վստահ է, որ ԱԳՆ-ում Մարիա Պեյչինովիչ Բուրիչի հետ հանդիպմանը չի բարձրաձայնվել ոչ Հայաստանի քաղբանտարկյալների, ոչ  Բաքվի բանտերում գտնվող հայ գերիների մասին։

«Այդ  լռության պայմաններում է, որ մենք ունեցանք Նարեկ Սամսոնյանի և Վազգեն Սաղաթելյանի գործերը, երբ  մարդիկ ընդդիմադիր խոսք են ասում, հաղորդման ընացքում քննարկում քաղաքական հարցեր ու  իշխանությունները վերակենդանացնում են ծանր վիրավորանքի հոդվածը շինծու մեղադրանքով։

Սա էր այս հավաքի ուղերձը։ Որքան հնարավոր էր, մենք տեղ հասցրեցին»,- ասաց Մելիքյանը։