Ձեր վստահելի աղբյուրը

Վերջին 2-3 օրերին սահմանին իրավիճակը որոշակի ակտիվացել է, նաև  Հայաստանի  տարբեր բնականավայրեր են թիրախավորվել Ադրբեջանի կողմից։ ԱԺ «Պատիվ ունեմ» խմբակցության պատգամավոր Տիգրան Աբրահամյանի համոզմամբ՝ միջնորդական  առաքելությունը, որ ստանձնել են տարբեր  միջազգային սուբյեկտներ և փորձում են  ցույց տալ, որ ամեն ինչ անում են մեր տարածաշրջանի կայունության և խաղաղության  ապահովման տեսանկյունից, այս իրավիճակում նրանց քայլերը պետք է լինեն շատ ավելի գործուն։

«Սպասում ենք ԵՄ առաքելությունից ոչ միայն փաստերի արձանագրում, զեկույցներում դրանց ամրագրումը, այլ շատ կարևոր է,  որ դրանք  վերածվեն նաև քաղաքական ճնշումների»,- ԱԳՆ դիմաց բողոքի ակցիայի ժամանակ ասաց պատգամավորը։

Նա նշեց, որ Ադրբեջանի կողմից վերջին շրջանում ակտիվությունն ուղեկցում է նաև Ադրբեջանի կողմից բավականին ինտենսիվ  ռազմական մատակարարումների ներկրմամբ և այս իրավիճակում, կարծում է, ակնհայտ է, թե ինչու համար է Ադրբեջանը դա իրականացնում։

«Դժվար է ասել այս, թե մեկ այլ փուլում իրադարձությունն ինչպես կզարգանա, բայց ակնհայտ է, որ այս գործընթացը և  Ադրբեջանի  սպառազինումը տեղի է ունենում բոլորի աչքի առաջ  և, բնականաբար, այդ զենքերն ու զինատեսակները մի օր կրակելու են»,- ասաց Տ. Աբրահամյանը։

Նա կարծում է, որ այս պահին լայնամասշտաբ ռազմական գործողությունների հնարավորությունն այդքան էլ մեծ չէ, ինչն, իհրակե, չի բացառում որոշ ուղղություններով հավանական են գործողություններ։

Աբրահամյանն ընդգծեց, որ այն սուբյեկտները, կառույցները, երկրները, որոնք հայտ են ներկայացնում Հարավային Կովկասում անվտանգություն և խաղաղություն ապահովելու հարցում, նրանց քայլերը պետք է լինեն առարկայական. դա վերաբերում է ԱՄՆ-ին, ԵՄ-ին, ՌԴ-ին։ 

«Մեր հասարակության համար այդ քայլերն ու առաջարկվող գործիքակամզը պետք է լինի ընկալելի, տեսանելի, արտահայտվի կոնկրետ առաջնագծում»,- ասաց պատգամավորը։ 

Տիգրան Աբրահամյանը նաև ասաց. «Այն հանգամանքը որ պայմանականորեն հավաքական Արևմուտքը և տարբեր երկրներ անտեսնում են քաղբանտարկյալերի  ներկայությունը հայաստանյան իրականության մեջ և այս պայմաններում  Հայաստանին ժողովրդավարության կամ մարդու իրավունքների առումով գնահատական են հնչեցում, բնական է,  դրանք մեր  հանրության համար չեն կարող անկեղծ հնչել։
Այսօր Հայաստանի իշխանությունը գործադրում է  բոլոր քայլերը, որոնք քողարկում են մի կողմից,  մյուս կողմից էլ ԵՄ նաև քաղաքական նպատակահարամրությունից ելնելով բլոկում է  քաղբանտարկյալների  կամ ժողովորդավարության հետ կապված ցանկացած  խնդիր, որը կապված է Հայաստանի հետ»։ 

Հիշեցնենք, որ Հայաստան է ժամանել Եվրոպայի խորհրդի գլխավոր քարտուղար Մարիա Պեյչինովիչ Բուրիչը։ ԱԳՆ դիմաց հասարակական, քաղաքական գործիչները բողոքի ակցիա էին իրականացնում Հայաստանի քաղաքական բանտարկյալների և Բավքում գտնվող հայ գերիների ազատության պահանջով։

Մանրամասն՝ տեսանյութում։