Ձեր վստահելի աղբյուրը

«Առաջինից երկրորդ ընթերցում փոխել ենք օրենքի վերնագիրը և այն կոչվում է. «Ընտանիքում և կենցաղային բռնության կանխարգելման, ընտանիքում և կենցաղային բռնության ենթարկված անձանց պաշտպանության և ընտանիքում համերաշխության վերականգնման մասին»»,-ԱԺ ՄԻՊ և հանրային հարցերի մշտական հանձնաժողովում հայտնեց ՔՊ-ական պատգամավոր Զարուհի Բաթոյանը՝ զեկուցելով իր հեղինակած օրենքը։

ՔՊ-ական պատգամավորը հայտնեց, որ առաջինից երկրորդ ընթերցում ընդունել է և՛ կառավարության, և՛ ԱԺ ընդդիմադիր «Հայաստան» խմբակցության առաջարկությունները։

Բաթոյանը նշեց, որ Ապրիլի 7-ի համատեքստում օրենքն առանձնակի կարևորություն ունի, քանի, որ հիմնականում կանանց իրավունքների պաշտպանությանն է ուղղված։

Նիստին ներկա ՔՊ-ական պատգամավորները չանդրադարձան նախագծով ներմուծվող խնդրահարույց «զուգընկեր» հասկացությանը և դրա սահմանմանը։

Օրենքի հիմնավորման մեջ ասվում է. «Գործող կարգավորումներով օրենքը տարանջատում է համատեղ բնակվող ընտանիքի անդամներին, համատեղ չբնակվող անդամներից, ինչը պրակտիկայում խնդիրներ է առաջացնում անձի պաշտպանական միջոցների դիմելու և ստանալու համար: Նկատի ունենալով Հայաստանում ընտանեկան հարաբերությունների համակարգը, ակնհայտ է, որ համատեղ չբնակվելու հանգամանքը միշտ չէ, որ կանխարգելող բնույթ է կրում բռնության համար: Ուստի օրենքը պետք է տարածվի ընտանիքի անդամների վրա՝ անկախ համատեղ բնակության հանգամանքից, ինչպես նաև կարգավորումներ ունենա զուգընկերների և նախկին զուգընկերներների համար:

«Զուգընկեր» հասկացությունն օրենքով սահմանված չէ և օրենքի գործողության շրջանակից դուրս է մնում հաճախ ընտանեկան բռնության սուբյեկտ հանդիսացող անձը: Ընդ որում, բռնությունը գործադրվում է զուգընկերոջ կողմից վերահսկողություն, ուժ, իշխանություն և ազդեցություն կիրառելու նպատակով, ինչը հնարավոր չէր լինի, եթե բռնության ենթարկված զուգընկեր հանդիսացող անձը՝ ելնելով հաստատված հարաբերությունների բնույթից (մտերիմ, սեռական) չունենար որոշակի կախվածություն բռնություն գործադրած անձից...

Առաջարկվող կարգավորման բնույթը

Առաջարկվող իրավական ակտով նախատեսվում է փոփոխություններ և լրացումներ կատարել «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգման մասին» ՀՀ օրենքում և կից օրենքների փաթեթում, մասնավորապես՝

1. լրացնել օրենքի վերնագիրը,

. հստակեցնել առկա սահմանումները, դրանք համապատասխանեցնել ՀՀ Քրեական օրենսգրքի սահմանումներին, լրացնել նոր սահմանումներով,

3.վերանայել համատեղ բնակվող և համատեղ չբնակվող ընտանիքի անդամներին տարանջատելու կարգավորումը,

4. Oրենքով որպես բռնության ենթարկված անձ դիտարկել երեխային, ով անմիջականորեն ականատես է եղել բռնության կիրառմանը և/կամ կրել է այդ բռնության բացասական հետևանքներն իր վրա (անուղղակի զոհեր):

5. վերանայել անհետաձգելի միջամտության և պաշտպանական որոշման ժամկետները,

6.ուժը կորցրած ճանաչել հաշտեցման ընթացակարգի վերաբերյալ սահմանումը,

7.հստակեցնել կանխարգելիչ հաշվառման շրջանակում ընտանեկան բռնության դեպքերի մոնիթորինգի պատասխանատուների շրջանակը և մեխանիզմները, հստակեցնել ընտանեկան բռնության կանխարգելման և ընտանեկան բռնության ենթարկված անձանց պաշտպանության բնագավառում լիազոր մարմնի և մյուս դերակատարբերի լիազորությունները,

8.առաջնային բուժօգնության փոխարեն օրենքով սահմանել ընտանիքում բռնության ենթարկված անձանց համար անվճար և արտոնյալ պայմաններով բժշկական օգնություն և սպասարկում՝ բռնության դեպքով պայմանավորված անձի առողջական խնդիրների լուծման նպատակով,

9. սահմանել բռնության ենթարկված անձանց համար նախատեսված ապաստարանների մատչելիության պահանջ հաշմանդամություն ունեցող անձանց համար,

10.վերանայել ՀՀ Քրեական Օրենսգրքի մի շարք հոդվածների ծանրացնող հիմքերը, մասնավորապես՝ ներառել սեռով պայմանավորված հիմքը, ինչպես նաև արարքը մերձավոր ազգականի, զուգընկերոջ կամ նախկին զուգընկերոջ կողմից կատարված լինելու փաստը,

11.հստակեցնել և դյուրինացնել ՀՀ Քաղաքացիական դատավարության օրենսգրքով սահմանված պաշտպանական որոշմանն առնչվող հայցադիմումի ընթացակարգերը, քննության և ծանուցման ժամկետները և պայմանները,

12.սահմանել ավելի բարձր տուգանքներ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքով սահմանված Անհետաձգելի միջամտության որոշումը կամ Պաշտպանական որոշումը դիտավորությամբ չկատարելու դեպքում,

13.նոր կարգավորում նախատեսել ՀՀ քրեական օրենսգրքում՝ հետամտման համար»:

Հանձնաժողովի 4 ՔՊ-ական պատգամավորները կողմ քվեարկեցին օրինագծին։