Ձեր վստահելի աղբյուրը

 ԱԺ նախագահ Ալեն Սիմոնյանը խորհրդարանական հայտարարությունների ժամին, արձագանքելով պատգամավոր Գեղամ Մանուկյանի ելույթին, հայտարարեց․ «Դեռևս 2009 թվականին իշխանությունը վարչատարածքային օրենքի մեջ փոփոխություն է կատարել և արեց մեջբերում օրենքից․ «Ներկայացված նախագծով նախատեսվում է նախկինում Ադրբեջանի կազմում եղած Տիգրանաշեն գյուղը ընդգրկել Արարատի մարզի Պարույր համայնքի, Բարխուդարլու և Ասկիպարա գյուղը Ազատամուտ և Ոսկեպար համայնքների կազմում՝ միաժամանակ նշելով, որ նրանց սահմանները կճշտվեն հայ-ադրբեջանական հարաբերությունների կարգավորումից հետո:Սրանից հետո 2016թ․-ին Տավուշի մարզպետարանը, որպեսզի հիմնավորի,  գրություն է գրում հետևյալ բովանդակությամբ.

«Հայաստանի վարչատարածքային բաժանման մասին ՀՀ օրենքում փոփոխություններ կատարելու մասին օրենքի առաջին հոդվածի Տավուշ ենթաբաժ-նի 4-րդ կետում նշված է Ասկիպարա գյուղը: Տեղյակ եմ պահում, որ Տավուշի մարզում նման բնակավայր երբեք չի եղել: Այն եղել է Ադրբեջանական ԽՍՀ Ղազախի շրջանի անկլավ ՀՀ Նոյեմբերյանի շրջանի Ոսկեպար վարչական տարածքում և անցած դարի 90-ական թվականներին դադարել է գոյություն ունենալ»։ Սա գրում է ՀՀԿ-ական մարզպետը իր ՀՅԴ-ական տեղակալով: Սրանից հետո ինչ է  տեղի ունենում, դաշնակցականները կողմ է քվեարկել:

Եվ վերջում, պարոն Մանուկյանն ասում է՝ ավելի հեշտ է ադրբեջանցիներին բացատրել, քան այսօրվա իշխանություններին: Այ, կգնաք, ձեր գործընկերներին կբացատրեք այն, ինչ փորձում էիք ադրբեջանցիներին բացատրել: Եթե մոտներդ ստացվի, միգուցե  հնարավորություն տաք,  գնանք բացատրենք»։

Ինչ վերաբերում է ՀՀ սահմանին, ապա Սիմոնյանն ասաց ․ «ՀՀ սահմանից որևիցե մաս քննարկման ենթակա չէ: Չի՛ քննարկվում, բանակցությունները վարվում են, աշխատանքային խմբերը հանդիպում են, դա որևիցե բան չի նշանակում, կարող է` ինչ-որ մի պահ մենք ընդհանրապես հրաժարվենք որևիցե բան ստորագրելուց, եթե չգանք համաձայնության։ Կրկնում եմ՝ ՀՀ որևիցե մարզից, որևիցե բան քննարկման ենթակա չէ»։