Ձեր վստահելի աղբյուրը

«Բավականաին ուշագրավ է փոխվարչապետի գրասենյակի հայտարարությունը, որովհետև մինչ այդ Նիկոլ Փաշինյանից սկսած մինչև  իշխանական այլ գործիչներ պնդում էին, որ իրականության մեջ սկսվել է սահմանազատման ու սահմանագծման գործընթացը»,-Ազգային ժողովում լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը։

Հիշեցնենք, որ ապրիլի 3-ին  փոխվարչապետ Մհեր Գրիգորյանի գրասենյակից տեղեկացրել էին՝ Հայաստանի և Ադրբեջանի  հանձնաժողովները մի շարք հարցերի, այդ թվում՝ սահմանազատումը Տավուշի մարզից սկսելու վերաբերյալ որևէ կայացված որոշում կամ ձեռք բերված համաձայնություն չունեն:

«Փոխվարչապետի գրասենյակի  հայտարարությունն արձանագրում է, որ իրենց քաղաքական  ղեկավարը, ըստ էության, սուտ է խոսել, երբ որ մարդկանց հետ հանդիպել է ու ասել, որ այս գործընթացը  սկսվել է ու որոշվել է Տավուշի մարզից է լինելու։ Արձանագրվել է նաև, որ իրականության մեջ Ադրբեջանի հետ չկա այս գործընթացն առաջ մղելու պայմանավորվածություն»,- ասաց ընդդիմադիր պատգամավորը։

Նա նշեց, որ դելիմիտացիայի գործընթաց սկսելու համար պետք է լինի փոխհամաձայնեցված իրավական փաստաթղթային բազա, այդ թվում համապատասխան քարտեզներ, որոնց հիման վրա իրականացվի այս գործընթացը։

«Եթե այդ համաձայնությունը գոյություն չունի,  սահմանների դեմարկացիա և դելիմիտացիա  չի կարող լինել։ Սա ևս մեկ անգամ ցույց տվեց, որ իշխանությունն այս  իրականության մեջ գնում է  ոչ թե դեմարկացիայի և դելիմիտացիայի  գործընթացի,  այլ գնում է միակողմանի զիջումների,  ուղղակի փորձում է  քողարկել իրական գործընթացը,  ինչը տեղի է ունենում մեզ հետ»,- ասաց Տ.Աբրահամյանը։