Ձեր վստահելի աղբյուրը

«Երբ այցելեցիք Ոսկեպար և Կիրանց ներկայացնելու ձեր պատկերացումը սահմանազատման և սահմանագծման մասին, դրանից հետո, մեղմ ասած և՛ Ոսկեպարի, և՛ Կիրանցի, գուցե՝ Բաղանիսի և Բերքաբերի հանրությունը մինչև հիմա զարմացած են, ինչ էր եկել մեզ ասելու Նիկոլ Փաշինյանը»,-ասաց «Հայաստան» խմբակցության պատգամավոր Գեղամ Նազարյանը՝ դիմելով Փաշինյանին։

Նա հիշեցրեց, որ Փաշինյանն իր ելույթում նշում է, որ  այդ տարածքների վերադարձը չի երաշխավորում շատ հարցեր և Փաշինյանին առաջարկեց այնտեղ ապրող գյուղացիներին  կրկին բացատրել, թե ինչ է ասել։

Նիկոլ Փաշինյանն ասաց, որ պատգամավորը հիշատակեց իր խոսքի այն հատվածը, որտեղ նշել է, որ չի երաշխավորվում, բայց և ասել է, թե ինչ պետք է անեն, որ երաշխավորվեն անվտանգության խնդիրները։

«Բայց այս «չի եշխավորվելու»-ից մինչև «երաշխավորելը» ճանապարհ կա անցնելու։ Բայց իմ ելույթում, գուցե լայն իմաստով, բայց Ձեր բոլոր հարցերին պատասխանում եմ»,-արձագանքեց Նիկոլ Փաշինյանը։

Նրա խոսքով՝ «չերաշխավորվելուց» մինչև «երաշխավորվելը» կա աշխատանք և այդ աշխատանքը պետք է հայկական կողմն անի և չնայի հյուսիս, արևմուտք կամ հարավ։

Փաշինյանի խոսքով, այսօր ոչ միայն Տավուշում այլև Հայաստանի այլ վայրերում էլ ադրբեջանցիները մետրերի վրա են հայկական գյուղերից  և այդ հիմնահարցը պետք է  լուծվի սահմանը հաստատելով։

«Եթե զարգացման որևէ պայմանավորվածության  լինի, որի իրականացման հավանականությունը 50-60 %-ից  բարձր կլինի, ես վերադառնալու եմ այնտեղ և նաև տեղում ավելի պրակտիկ հարցերին պատասխանեմ»,- ասաց Փաշինյանը՝ ակնարկելով Ոսկեպարի և Կիրանցի բնակիչների հետ նոր հանդիպումը։