Ձեր վստահելի աղբյուրը

«Նիկոլ Փաշինյանը բերել ու բերում է պատերազմ, կորուստներ, պարտություն, նա ահաբեկում է  մեր ժողովրդին ու իր քայլերով նախապատրաստում Հայաստանի կործանումը»,- Ազգային ժողովում Հայաստանի կառավարության ծրագրի 2023 թվականի կատարման ընթացքի և արդյունքների մասին զեկույցի քննարկումից հետո ասաց «Հայաստան» խմբակցության պատգամավոր Արեգնազ Մանուկյանը։

Նա նշեց, որ Նիկոլ Փաշինյանն ադրբեջանական ցանկությունների իրականացնողն է. «Ինքն արդեն սահմանագծում ու սահմանազատում է  Հայաստանի տարածքը՝ խոստովանելով, որ Ադրբեջանը ոչ մի քարտեզ հիմք չի ընդունում։ Այդ դեպքում ո՞ր հիմքով է նա այս կամ այն տարածքը համարում ադրբեջանական»։

«Փաշինյանը Հայաստանի մակետն առել է ձեռքն ու այն թափահարում է շուկայի վաճառականի նման «էստի համացեք» կանչելով։ Այո, Հայաստանը սահմանազատման ու սահմանագծման կարիք ունի, դրանք  կարող են իրականացվել բացառապես  սովետական քարտեզներով, ինչը բնականորեն  ենթադրում է ռուսական միջնորդություն։ Իրարամերժ  հարթակներում և առանց քարտեզի սահմանագծում ու սահմանազատում հնարավոր չէ իրականացնել, դա առնվազն արկածախնդրություն և անգրագիտություն է, իրականում՝  պետական հանցագործություն։

«Տարածքները հանձնենք, որ  պատերազմ չլինի» իշխանական բլեֆ կարգախոսը պետք է փոխարինենք «Փաշինյանին հեռացնենք, որ խաղաղություն լինի» իրական կարգախոսով»,- ասաց Մանուկյանը։

Նրա ելույթից հետո դահիճից լսվեց՝ «մոլոդեց»։

ԱԺ նախագահ Ալեն Սիմոնյանը հիշեցրեց. «Հայաստանում  պետական լեզուն հայերենն է»։ Դահլիճից ինչ-որ արձագանքից հետո՝ Սիմոնյանն ասաց. «Գուցե ձեզ համար թուրքերենն է»։