Ձեր վստահելի աղբյուրը

«Կառավարությունը կատարել է Ազգային ժողովի հաստատած ծրագրի հակառակը»,- Ազգային ժողովում Հայաստանի կառավարության ծրագրի 2023 թվականի կատարման ընթացքի և արդյունքների մասին զեկույցի քննարկումից հետո ասաց «Հայաստան» խմբակցության պատգամավոր Արմեն Ռուստամյանը։

Նա նշեց, որ խորհրդարանական երկրում սա կառավարության գործունեության հետ կապված ոչ լեգիտիմության խնդիր է առաջացնում, այլ հարուցում է նրա նկատմամբ սահմանադարական լիազորությունների  վերազանցման մեղադրանք։ 

Ռուստամյանի խոսքով, այն, ինչ կառավարությունը  փաստացի է կատարում ի հեճուկս  ծրագրով իր ստանձնած պարտավորության, վերջնարդյունքը խաղաղության պատրանքի դիմաց աշխարհաքաղաքական մակարդակում հայկական գործոնի իսպառ վերացումն է լինելու։

«Պատկերավոր ասած՝ աշխարհաքաղաքական  գծի վրայից  դրվելու է աշխարհաքաղաքական պարկի մեջ և նրա գոյությունն այլևս աշխարհաքաղաքական առումով ոչ մի նշանակություն չի ունենա։

Թուրք-ադրբեջանական տանդեմի շարունակական պահանջները հենց սրան են ուղղված՝ մեր ֆիզիկական գոյությունը թույլ տալու դիմաց»,- ասաց ընդդիմադիր պատգամավորը։

Նա նշեց, որ Ադրբեջանը, վախեցնելով պատերազմով, նորանոր զիջումներ է կորզում, իսկ Հայաստանի կառավարությունն իր հերթին մեր  ժողովրդին վախեցնելով անխուսափելի պարտությամբ՝ ստիպում է  ապավինել Ադրբեջանի խոստացած խաղաղությանը։

«Ակնհայտ է, որ այդպիսի խաղաղության երաշխավորը կարող է միայն թուրք-ադրբեջանական տանդեմը լինելը և պետք չէ  տպավորություն ստեղծել, թե այդ նոր  անվտանգային համակարգի ճարտարապետը Արևմուտքն է լինելու։ Արևմուտքը մեկ անգամ չէ, որ կարևորել է  ՆԱՏՕ-ի անդամ Թուրքիայի գլխավոր դերակատարությունն ու  առաջնորդությունն այս տարածաշրջանում, հետևաբար Ռուսաստանից դժգոհելով՝  նախկին անվտանգային համակարգը փոխարինում ենք թվացյալ արևմտյանով, որի իրական առանցքը Թուրքիան է լինելու։

Այսինքն, անվտանգային համակարգի այսպիսի փոփոխության վերջնարդյունքում պարզապես Ռուսաստանի փոխարեն գալու է Թուրքիան։ Եվ ուրեմն՝ հարցերի հարցը հետևյալն է՝ կառավարությունն իր ծրագրով չնախատեսված, փաստացի ապօրինի և ինքնագլուխ, ժողովրդի թիկնքում այսինչ իբրև թե անվտանգային նոր համակարգ է ձևավորում»,- ասաց Արմեն Ռուստամյանը։

Ելույթն ամբողջությամբ՝ տեսանյությում։