Ձեր վստահելի աղբյուրը

«Այսօր էլ եմ ասում՝ մենք սերում ենք Կիլիկիայից, հայկական բարձրաբանդակից, Վանի թագավորությունից, բայց մենք պետք է այսօրվա աշխարհին նայենք Վանի թագավորության աշտարակի՞ց, թե Հայաստանի Հանրապետության Աշտարակից»,- Ազգային ժողովում հայտարարեց Նիկոլ Փաշինյանը։

Նա նշեց. «Ես և Հայաստանի կառավարությունն ընդունում է, որ Խոր Վիրապից մի քանի մետր այն կողմ Թուրքիան է։ Հայաստանի կառավարության համար այս արձանագրումը անվտանգության ապահովման համար կարևորագույն միջոց է։ Ռազմավարական ընտրությունը հենց սրա մեջ է։
Երբ ասում ենք, որ Խոր Վիրապից մի քանի մետր այն կողմ Թուրքիա չկա, ընդունում ենք պատմական Հայաստանը, իսկ երբ ասում ենք՝ Խոր Վիրապից մի քանի մետր այն կողմ Թուրքիան է, ընդունում ենք իրական Հայաստանը։

Նույն մոտեցումն է նաև Ոսկեպարի դեպքում է, որովհետև, երբ դու չես համաձայնում դնել սահման քո ու  ուրիշի միջև, դու քեզ խառնում ես ուրիշին, ուրիշին էլ հնարավորություն ենք տալիս մտնել մեր ինքնիշխան տարածք։ Ես ասում եմ՝ այդ ճանապարհը մենք պետք է փակենք։

Սա մենք պետք է արձանագրենք որպես ռազմավարական մշտականություն։

Որոշ հոգևորականներ, որ հիմա հիշել են Ոսկեպարում եկեղեցի կա, շոու-պատարագ են անում, քանի՞ անգամ են այս ընթացքում այդ եկեղեցու մասին հիշել ու քանի անգամ են այնտեղ պատարագ արել։ Սա ստենդա՞փ է, ես չեմ հասկանում»։ 

Փաշինյանը նշեց, թե ասում են՝ այս կառավարությունը ճանաչեց Ադրբեջանի տարածքային ամբողջականությունը. «Մենք իրականում Հայաստանի  տարածքային ամբողջականությունն ենք ճանաչել, և Ադրբեջանի տարածքային ամբողջականությունը ճանաչելու փաստը մեզ անհրաժեշտ է Հայաստանի տարածքային ամբողջականությունը ճանաչելու համար, որովհետև Հայաստանի տարածքային ամբողջականությունը պարփակված է Ադրբեջանով։ Եթե դու չես ճանաչում իրենց տարածքային ամբողջականությունը, դու քո տարածքային ամբողջականությունը, քո երկրի գոյությունը չես ճանաչում»։