Ձեր վստահելի աղբյուրը

«Որոշման նախագծի ընդունումը պայմանավորված է 2024 թվականի գյուղատնտեսական տարվա համար Գյուղատնտեսության ոլորտում ապահովագրական համակարգի ներդրման փորձնական ծրագրի իրականացումը ապահովելու անհրաժեշտությամբ»,-կառավարության նիստում հայտնեց էկոնոմիկայի նախարար Գևորգ Պապոյանը  զեկուցելով «Հայաստանի Հանրապետության կառավարության 2019 թվականի հոկտեմբերի 24-ի N 1485-Լ որոշման մեջ փոփոխություններ և լրացումներ կատարելու մասին» որոշումը․

Նախարարը հայտնեց, որ ծրագրի շրջանակում 2023 թվականին ապահովագրվել էին ծիրան, խաղող, դեղձ, սալոր, խնձոր, կեռաս, բալ, ձմերուկ, սեխ, կարտոֆիլ, աշնանացան/գարնանացան ցորեն, գարի և վարսակ մշակաբույսերը։

«Ապահովագրվող ռիսկերն էին՝ գարնանային ցրտահարությունը, երաշտը, կարկուտը և հրդեհը։ 2023 թվականի գյուղատնտեսական տարվա համար ապահովագրվել էր 11662 հա հողատարածք, ապահովագրավճարը կազմել էր շուրջ 1,8 մլրդ դրամ, դեկտեմբերի 31-ի դրությամբ տրամադրվել էր շուրջ 3864 ապահովագրական հատուցում՝ շուրջ 2․7 մլրդ դրամի չափով։

Ապահովագրական և վերաապահովագրական գործունեությունից ապահովագրական ընկերությունների մոտ գեներացված եկամուտների և ծախսերի հաշվարկի վերլուծությունը ցույց է տվել, որ ապահովագրական ընկերություններն իրենց կողմից ստանձնած ռիսկերի գծով ապահովագրական հատուցումները, ինչպես նաև՝ Գյուղատնտեսությունը Ապահովագրողների Ազգային Գործակալության անդամավճարները վճարելուց և Swiss Re վերաապահովագրական ընկերության կողմից միջնորդավճարները ստանալուց հետո թվով 3 ապահովագրական ընկերությունների մոտ ձևավորվել է ընդհանուր շուրջ 49,4 մլն ՀՀ դրամի չափով վնաս (2 ապահովագրական ընկերություն՝ ընդամենը շուրջ 52.7 մլն դրամի չափով վնաս, 1 ընկերություն՝ շուրջ 3.3 մլն դրամ եկամուտ)»,- հայտնեց Պապոյանը։

Նախարարը հայտնեց, որ 2024 թվականի գյուղատնտեսական շուկայից վերաապահովագրական ընկերության դուրս գալով՝ ապահովագրական ընկերությունները չէին կարող ստանձնել ամբողջ ապահովագրության ռիսկերը, հաշվի առնելով կլիմայի փոփոխությամբ պայմանավորված բարձր վնասաբերությունը և այդ պատճառով էլ ծրագիրը ժամկետից ուշ է մեկնարկել։

Հայտնելով, որ որոշվել է այս տարավա համար ծրագրի ժամանակավոր լուծում գտնել՝ նախարարան ասաց. «Ծրագրին ապահովագրական ընկերությւոնների մասնակցության համար առաջարկվում է, որ այս տարի կառավարությունը բացի ապահովագրավճարի սուբսիդավորում, մասամբ կիսի ապահավագրական ռիսկը, այսինքը՝ աջակցի ապահովագրական ընկերություններին ապահավագրության շեմը որոշակի գերազանցելու դեպքում փոխհատուցում տրամադրելու միջոցով։

Նախատեսվում է գործակալությանը անդամակցող յուրաքանչյուր ապահովագրան ընկերությանը փոխհատուցել ապահովագարական ընկերության կողմից ընդհանուր ապահովագրած ապահովավճարի հանրագումարի 70 %-ի չափը գերազանցող տնտեսվարողներին փոխհատուցված ապահովագրությունների 80%-ը»։

Պապոյանը հայտնեց, որ նախատեսում են, որ այս տարի կկարողանան ապահովագրել դեղձը, սալորը, խնձորը, բալը, կեռասը, ձմերուկը սեխը և կարտոֆիլը՝ կարկուտի ռիսկից, իսկ ցորենը, գարին և վարսակը՝ երաշտի ռիսկից։

Նիկոլ Փաշինյանը հետաքրքրվեց, թե ինչու է փոխվել ապահովագրման ենթակա  մշակաբույսերի ցանկը, արդյոք ցրտահարություն չի լինելու։

Պապոյանը հույս հայտնեց, որ ցրտահարություններ չեն լինի։

Նիկոլ Փաշինյանն արձագանքեց՝ ասելով՝ «Ինչի՞ պառվի ուլերը դեռ չեն սատկել... Ցորենը ինչո՞ւ կարկուտից չեն ապահովագրում։ Մարդիկ գիտեին, թե կարկուտը որտեղ է խփում, տանում ցանում էին, որ ծեծի, իրենք էլ ապահովագրություն ստանային»

Անդրադառնալով վերաապահովագրող ընկերույթյան՝ Հայաստանից հեռանալու փաստին՝ Փաշինյանն ասաց. «Ապահովագրական ընկերություններն իրենց ապահով են զգացել, որովհետև կառավարությունը իրենց ապահավագրության կեսը տվել է, վերաապահովագրողը, որը օտարերկրյա կազմակերպություն է, ասել է՝ ժողովուրդ ջան, կարող է դուք պետք է գնաք նստեք, ասեք՝ վայ կարկուտ ջան արի, կարկուտ ջան արի, մեք էլ դրա համար պետք է վճարենք։ Չի լինի նման բան»։