Ձեր վստահելի աղբյուրը

Թուրքիայի արդարադատության նախարար Յըլմազ Թունչն այսօր հայտարարել է, որ իշխանությունները ձերբակալել են 13 մարդու՝ Թուրքիայում ճոպանուղու վթարի հետաքննության շրջանակում։ Այս մասին գրում է «Ռիա Նովոստի» գործակալությունը։

Ըստ պաշտոնյայի,  ենթադրվում է, որ վթարի պատճառը մետաղական կառույցների կորոզիան է եղել։

Փրկարարներն այսօր ավարտել են Թուրքիայի Անթալիա քաղաքում ճոպանուղու վթարի հետևանքով  օդում մնացած 174 մարդկանց տարհանումը: Մարդիկ այնտեղ անցկացրել են գրեթե մեկ օր։

Թուրք նախարարը պարզաբանել է, որ միջադեպը հանգեցրել է մեկ մարդու մահվան, ընդհանուր առմամբ 17 մարդ վնասվածքներ է ստացել։ Արդարադատության նախարարը «X» սոցիալական ցանցում գրել է, որ նախնական ստուգման արդյունքներով պարզվել է, որ ճոպանուղին շահագործող ընկերությունը արտակարգ իրավիճակների դեպքում տարհանման ծրագիր չի ունեցել։

«13 անձի կալանավորման որոշում է կայացվել։ Նրանց թվում են գործող ընկերության, ինչպես նաև համակարգի պահպանման համար պատասխանատու ընկերության աշխատակիցներ»,- գրել է նախարարը։