Ձեր վստահելի աղբյուրը

Երեկ գիշեր Իրանի կողմից Իսրայելի դեմ գործողության հետևանքով զոհեր ու վիրավորներ չկան։ Panorama.am-ի հետ զրույցում ասաց Պետահ-Տիկվայի «Նաիրի» միության նախագահ, «Իսրայելահայեր» թերթի գլխավոր խմբագիր Արտյոմ Չերնամորյանը։

«Հայկական համայնքը զոհեր ու վիրավորներ չունի, չնայած հրթիռները թռչում էին Երուսաղեմի վրա, այնտեղ տագնապ հնչել է»,- նշեց նա։

Նրա փոխանցմամբ, այս պահին իրավիճակը հանգիստ է, բայց երկրում գործում են սահմանափակումներ՝ դպրոցներում արձակուրդ է, ճամբարներն արգելված են, ցույցեր անցկացնելու իրավունք չկա, հավաքները՝ սահմանափակ թվով։

«Հայոց ցեղասպանության հիշատակի օրը՝ ապրիլի 24-ին, Թել-Ավիվում հազիվ թե ցույց կազմակերպենք։ Այս տարի կսահմանափակվենք պատարագով ու Պետահ-Տիկվայում հուշարձանի մոտ ծաղիկներ կդնենք ու կկազմակերպենք մոմավառություն։ Երկիրն  ամսիներ շարունակ պատերազմի մեջ է, մարդկանց մի տեղ հավաքելը մեծ պատասխանատվություն է ենթադրում։ Անվտանգության հետ կապված լուրջ խնդիրներ կան»,- ասաց Արտյոմ Չերնամորյանը։

Ինչ վերաբերում է Իրանի գործողություններին ու Իսրայելում դրա արձագանքներին, նա պատասխանեց. «Շատ վերլուծաբաններ ասում են՝ դժվար թե Իսրայելը ռազմական օպերացիա ձեռնարկի կամ հարվածի Իրանին։ Այս ամբողջն Իսրայելը չէր անի, եթե վստահ չլիներ, որ Իրանը կհարձակվի։ Այս անգամ Իրանը խայծը կերավ, որովհետև Իրանը կարող էր շատ հանգիստ Իսրայելին պատասխանել իր պրոքսիներով՝ հանձինս Եմենի հութիների և «Հզբոլա»-ի։

Իրանը կարող էր ասել «Հզբոլա»-ին կրակի իր տարածքից, բայց չարեց ու ինքն անցավ գործի։ Սա հակահարված չէր, թեթև, ուղղակի ուժի ցուցադրություն էր, առաջին անգամ էր Իրանն իր տարածքից հարձակում կատարում Իսրայելի վրա։

Ապրիլի 1-ին, երբ Իսրայելը հարվածում էր Դամասկոսում Իրանի հյուպատոսության վրա, ԱՄՆ-ին տեղյակ պահեց հարվածը սկսելու ժամանակ, ոչ թե դրանից առաջ, այսինքն ԱՄՆ-ին հանկարծակիի բերեց։ Իհարկե, ԱՄՆ նաագահ Ջո Բայդենը խոսել է Իսրայելի վարչապետ Բենիամին Նեթանյահուի  հետ, որ  այժմ ռազմական գործողություններ չսկսեն, Իսրայելը չպատասխանի, բայց, վստահ եմ, որ այստեղ ռազմաքաղաքական կաբինետը խոսում է  Իրանին հարված հասցնելու մասին։

Քանի որ արդեն պատերազմը սկսվել է՝ մի կողմից կռվում են հութիների, մյուս կողմից «Հզբոլա»-ի, Համասի դեմ, անմիջապես առիթը ստեղծվել է Իրանի միջուկային ծրագրերի հարցը փակելու համար։

Ես ցանկացած սցենարի դեպքում տեսնում եմ վատ հետևանքներ Հայաստանի համար։ Եթե հարվածեն, պատերազմ սկսվի, չսկսվի, եթե Իսրայելը օգտագործի Ադրբեջանի կողմից գրավված հայկական հողերի վրա կառուցած իրենց հենակետերը, եթե Ադրբեջանը թույլ տա, կամ չտա, ցանկացած դեպքում Հայաստանի կառավարությունը պետք է ունենա սցենար, թե որ դեպքում ինչ հնարավոր բացասական հետևանքներ կարող է կրել Հայաստանը։ Պետք է կոնկրետ դաշինք կնքել արևմտյան պետությունների հետ, որոնք, իրոք, կարող են սատար կանգնել Հայաստանին,  և ոչ Ռուսաստանը»։

Նա ասաց, որ Իրանի ռազմական գործողությունների հետևանքով Իսրայելում շենք-շինություններ չեն վնասվել, հարավում մի զարամասի տարածքում օդանավակայան կա, այնտեղ մեծ փոս է գոյացել, բայց օդանավերի թռիչքներին, վայէջքների չի խանգարել։

Չերնամորյանը նաև հայտնեց, որ Իսրայելը մեկ օրվա պաշտպանության համար ծախսել է 1,3 միլիարդ դոլար. «Ամբողջ գիշեր օդանավերն աշխատում էին, պտտվում էին օդում, որպեսզի որևէ մի տեղ որևէ ԱԹՍ կամ  հրթիռ բաց չթողնեն։ Հիմնականում ԱԹՍ-ները խոցվել են Հորդանանի տարածքում, Իսրայելի սահմանը չեն անցել»։

Մանրամասն՝ ձայնագրությամբ։