Արթուր Սաքունց. Ես զոհին քաղաքական նպատակահարմարությամբ չեմ ընտրում
Սամվել Վարդանյանի նկատմամբ բռնությունների, խոշտանգման դեպքի վերաբերյալ շատ իրավապաշտպաններ ցուցաբերում են անտարբերություն, ինչն առաջացրել է սոցիալական ցանցերի շատ օգտատերերի զարմանքն ու տարակուսանքը։
Panorama.am-ը Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցից հետաքրքրվեց՝ նա տեղյա՞կ է դեպքին, ինչո՞վ է բացատրում իր լռությունը։
«Եթե մտածում են, որ ես պատվերով պետք է խոսեմ, կամ չխոսեմ, չարաչար սխալվում են։ Էդ մտահոգվողներն իրենք չէ, որ իմ մասին պետք է ասեն։ Դեպքի հետ կապված. խնդիրը կայանում է նրանում, որ մենք առանձին դեպքեր չենք դիտարկում։ Ես հասկանում եմ, որ քաղաքական բովանդակություն ունեցող հարցերին ավելի մեծ ուշադրություն է դարձվում»,-ասաց իրավապաշտպանը։
Նկատեցինք՝ փաստաբանները շեշտում են Սամվել Վարդանյանի նկատմամբ բռնության դեպքի այն առանձնահատակությունը, որ Սամվել Վարդանյանն այդ պահին եղել է ՁՊՎ տեղափոխման ճանապահին և ոստիկանների հսկողության ներքո։
«Ոստիկանության կողմից քաղաքացիների նկատմամբ խոշտանգումները, վատ վերաբերմունքի դեպքերը համակարգային խնդիր են մնում։ Մեր դիրքորոշումը հստակ է, բարեփոխումները բովանդակային չեն կատարվել, որևէ ազդեցություն չեն ունեցել հատկապես քրեական ոստիկանության բնագավառում։ Մենք արձանագրել ենք մշտապես, որ անպատժելիությունը մնում է համակարգային խնդիր, և պատահական չէ, որ միջազգային կազմակերպություններն էլ այդ մասին ահազանգում են։ Ուղղակի ամեն դեպքի հետ կապված, որ քաղաքական երանգ է խառնվում, ես չեմ ուզում խառնվեմ, որովհետև շատ դժվար է չդառնալ քաղաքական գործիք»,-ասաց նա։
Սաքունցի խոսքով, դեպքից հետո պետք է անմիջապես հարուցվեր քրեական գործ, ինչը չի արվել, անմիջապես պետք է հարցաքննվեին այն ոստիկանները, որոնց հսկողության ներքո է գտնվել անձը, անմիջապես հստակ անդրադարձ պետք է կատարվեր Ալեն Սիմոնյանի հանրային ելույթի գնահատկանին։
«Այս հարցերը պետք է քննության առարկա դառնային։ Անհապաղ պետք է քրեական գործ հարուցվեր, ոստիկանները հարցաքննվեին։ Խոշտանգումների դեմ պայքարի սկզբունքները հետևյալն են, նրանց ծառայողական պարտականությունները պետք է դադարեցվեին, մեկը մյուսից մեկուսացվեին։ Եթ այս ամենը չի արվում, կոչվում է անպատժելիություն կամ անպատժելիության խրախուսում։ Թե չէ հիմա մարդու իրավունքը դարձել է քաղաքական գործիք պայքարի, և այն մարդկանց կողմից, որոնք թքած ունեն մարդու իրավունքի վրա։ Շատ խայտառակ բան է»,-ասաց նա։
Մանրամասները՝ ձայնագրությամբ։
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
