Ձեր վստահելի աղբյուրը

«Ոստիկաններն են օգնել, որպեսզի  Սամվել Վարդանյանին ծեծեն, ձևական հեռացել են մեքենայից, շղթայակապված անձին թողել են անօգնական վիճակում»,- ՔԿ Երևանի քննչական վարչության դիմաց Panorama.am-ի հետ զրույցում ասաց փաստաբան Հովհաննես Խուդոյանը։

Նա նշեց, որ այստեղ երկրորդ կարծիք չի կարող լինել, քանի դեռ ծանրակշիռ ապացույցներով այլ բան չի հիմնավորվել. «Սա նախապես կազմակերպված է եղել, և ոստիկանների ներգրավվում է կազմակերպված եղել, և գալիս է շատ ավելի բարձր տեղերից։ Եթե նայենք այդ օրվա բոլոր իրադարձությունները՝ քաղաքական ուժի կողմից իրավապահ մարմինների ուղղորդումները, բռնության սպառնալիքները, այդ սպառնալքիների տիրաժավորումը, տեսնում ենք՝ դա ուղղված է վախի մթնոլորտ սերմանելու, որպեսզի որևէ անձ հանրային վայրում այլևս չհամարձակվի պարսավանքի, քննադատական խոսք հնչեցնել կամ որևէ տեսակի դիսկոմֆորտ առաջացնել իրենց քաղաքական թիմի անդամների համար»։

Խուդոյանի խոսքով՝ իրավական տեսանկյունից արարքը ծանր հանցագործություն է կազմակերպված խմբի կողմից, անձին խոշտանգել են, ոստիկաններ են մասնակից եղել դեպքին, դա առանձնապես ծանր հանցագործութուն է և նախատեսում է մինչև 12 տարի ազատազարկում։

Նա նշեց, որ երեկ կեսօրից արդեն այդ ծանր հանցագորության մասին տեղեկատվոթյուն է հրապարակվել,  բայց միայն քիչ առաջ Սամվելի փաստաբանների կողմից  հանցագործության մասին հաղորդում են ընդունել։

«Սա ևս վկայություն է, որ իրավապահ մարմինը հատուկ նեգատիվ  վերաբերմունք է դրսևորում Սամվել Վարդանյանի նկատմամբ, դա էլ կարելի է դիտարկել ընդհանուր գործի մասով ու դա էլ այս պահից սկսած կասկածի տակ է  դնում քննություն իրականացնող մարմնի անաչառությունը»,- ասաց փաստաբան Հովհաննես Խուդոյանը։