Ձեր վստահելի աղբյուրը

«Հրապարակ» թերթը գրում է.

«Հայաստանը կարևորում է Հայաստանի ու Թուրքիայի հատուկ ներկայացուցիչների շարունակական շփումները, բայց Սերդար Քըլըչ-Ռուբեն Ռուբինյան առաջիկա հանդիպման վերաբերյալ թուրքական կողմի հետ կոնկրետ պայմանավորվածություն դեռ չունի՝ «Հրապարակի» հարցին ի պատասխան հայտնում են ԱԳՆ-ից։

Մենք հետաքրքրվել էինք, թե երբ է նախատեսվում Սերդար Քըլըչի այցը Հայաստան, ինչ օրակարգով է թուրք պաշտոնյան պատրաստվում Հայաստան ժամանել, և արդյո՞ք Թուրքիայի հատուկ բանագնացի այցելության օրակարգում ներառված է տարածաշրջանային կապուղիների ապաշրջափակման հարցը։ «Հայաստանը շարունակում է կառուցողական ներգրավվածություն ունենալ Հայաստան-Թուրքիա հարաբերությունների կարգավորման գործընթացում և կարևորում է հատուկ ներկայացուցիչների շարունակական շփումները: Ներկայում Հայաստանի և Թուրքիայի հատուկ ներկայացուցիչների միջև առկա չէ հանդիպում անցկացնելու վերաբերյալ կոնկրետ պայմանավորվածություն և համաձայնեցված օրակարգ»,- նշված է ԱԳՆ պատասխանում։

Հիշեցնենք, որ ավելի վաղ Ռուբեն Ռուբինյանը հայտարարել էր, որ հայկական կողմն ընդունել է Թուրքիայի հատուկ ներկայացուցիչ Սերդար Քըլըչի առաջարկը՝ երկու երկրների հատուկ ներկայացուցիչների հաջորդ հանդիպումը Երևանում անցկացնելու վերաբերյալ, որը հնչել էր Անթալիայի դիվանագիտական ֆորումի շրջանակում։ Հայ-թուրքական գործընթացին օրեր առաջ անդրադարձել էր նաև ԵՄ հատուկ ներկայացուցիչ Տոյվո Կլաարը՝ նշելով, որ Եվրամիությունն աջակցում է Հայաստան-Թուրքիա գործընթացին, և հույս հայտնելով, որ բանագնացները մոտ ապագայում կհանդիպեն»։

Մանրամասները թերթի այսօրվա համարում։