Ձեր վստահելի աղբյուրը

«Մենք խստորեն հետևում ենք տարածքային ամբողջականության վերաբերյալ միջազգային օրենքներին»,- Panorama.am-ի հետ զրույցում ասաց  Հայաստանում Արգենտինայի դեսպանության առաջին քարտուղար և հյուպատոս Խուան Բ․ Սկարտասցինի դել Ռիոն՝ անդրադառնալով Հայաստանի և Ադրբեջանի միջև սահմանազատման և սահմանագծման գործընթացին։

«Ի հեճուկս տարածաշրջանում առկա բոլոր քաղաքական խնդիրների, Արգենտինան աջակցում է Հայաստանին և ճանաչում է նրա տարածքային ամբողջականությունը: Խրախուսում ենք Հայաստանի կողմից իր սահմանների որոշման գործընթացը,սահմանազատումը, իրավիճակը կարգավորելու համար հասարակական հանձնառությունը, որը, կարծում եմ, խաղաղություն և բարգավաճում կբերի Հայաստանին: Դա Արգենինայի ամենամեծ ցանկությունն է»:

Հյուպատոսը հստակեցնում է՝ խոսքը Հայաստանի՝ միջազգայնորեն ճանաչված սահմանների մասին է:

Նա նաև հիշեցրեց, թե ինչպիսի աջակցություն է ցուցաբերել Արգենտինան Արցախից տեղահանված հայերին։

«Արգենտինան շատ բան է արել և շարունակում է անել Լեռնային Ղարաբաղից տեղահանված մարդկանց համար: Տեսնելով  հումանիտար ճգնաժամը, անցյալ տարի Հայաստան ենք ուղարկել մարդասիրական բեռներ և «Սպիտակ սաղավարտներ» մարդասիրական առաքելությունը, քանի որ շատ լավ գիտակցում ենք, թե որքան կարևոր են այստեղ ապրող հայերի և այլ երկրներից եղած մարդկանց իրավունքները: Կարևոր է ընդգծել, որ Արգենտինայի հայ համայնքը մեջ ներդրում է ունեցել այդ մարդասիրական օգնությունը ուղարկելու գործում»,- ասաց նա։

Արգենտինայի դեսպանության ներկայացուցիչը հիշեցրեց, որ Արգենտինան նույնպես սահմանային խնդիրենր ունի՝ կապված Ֆոլկլենդյան և Մալվինյան կղզիների հետ։