Ձեր վստահելի աղբյուրը

Զինված ուժերի գլխավոր շտաբի նախկին պետ Օնիկ Գասպարյանն այսօր հարցաքննվել է Հակակոռուպցիոն դատարանում։ «Քիմիկների զորամասի» գործով նա վկայի դատավարական կարգավիճակ է ստացել։ Panorama.am-ի հետ զրույցում հայտնեց ԲԴԽ մամուլի խոսնակ Մերի Գևորգյանը։

«Հարցաքննությունը չի ավարտվել, այն կշարունակվի դատական հաջորդ նիստի ժամանակ, որը նշանակված է ապրիլի 26-ին»,-ասաց Բարձրագույն դատալան խորհրդի խոսնակը։

 Հիշեցնենք, որ 2020թ-ի հոկտեմբերի 21-ին Կովսականում իրականացրած մարտական գործողությունից հետո Էջմիածնի «Քիմիական զորամասի» 62 հոգանոց անձնակազմից 40-ը հետ չի եկել։

Հետագայում նրանցից հինգը վերադարձել է գերությունից, յոթի մարմինը նույնականացվել է, իսկ մնացած 28-ից  որևէ տեղեկություն չկա։

Հարուցված քրեական գործի շրջանակում քննվում է 40 զինծառայողների զոհվելու, գերեվարվելու և անհետ կորչելու հանգամանքները։

Էջմիածնի «Քիմիկների» զորամասի անհետ կորած զինծառայողների գործով հակակոռուպցիոն դատարանում տևական ժամանակ է հարցաքննվում են անհետ կորած կամ զոհված զինծառայողների ծնողները։ Քրգործում որպես մեղադրյալներ ներգրավված են Զինված ուժերի Գլխավոր շտաբի պետի նախկին տեղակալ Անդրանիկ Մակարյանը, վերը նշված զորամասի հրամանատար Արսեն Աբգարյանը, զորամասի շտաբի պետ Սարգիս Կուլակչյանը և զորամասի համալրման բաժանմունքի պետ Էլլադա Հարությունյանը։ 

Անդրանիկ Մակարյանին մեղադրանք է առաջադրվել ՀՀ ՔՕ 376 հոդվածի 3-րդ մասով, այն սահմանում է անփույթ վերաբերմունքը ծառայության նկատմամբ. սույն հոդվածի առաջին կամ երկրորդ մասով նախատեսված արարքները, եթե դրանք կատարվել են ռազմական դրության, պատերազմի ժամանակ կամ մարտի պարագաներում, պատժվում են ազատազրկմամբ՝ չորսից ութ տարի ժամկետով: Անդրանիկ Մակարյանի նկատմամբ խափանման միջոց է ընտրվել ստորագրությունը՝ երկրից չհեռանալու մասին։