Ձեր վստահելի աղբյուրը

«Մեր գիտական աշխատանքներով այլևս որոշ շրջանից սկսած Թուրքիայի ժխտողականությանը հակադարձելու խնդիր չի դրվել, որովհետև Հայոց ցեղասպանության փաստը ճանաչված է  Հայոց ցեղասպանությամբ զբաղվող բոլոր գիտնականների կողմից»,- ասուլիսում այս մասին ասաց Հայոց ցեղասպանության թանգարան-ինստիտուտի տնօրեն Էդիտա Գզոյանը։

Նրա խոսքով, այն անձինք, որոնք ժխտողական թեզեր են առաջ քաշում, հոդվածներ տպում, հեղինակավոր  ամսագրերում չեն տպագրվում, տպագրվում են միայն թուրքական ամսագրերում։

«Իսկ մեր՝ միջազգային կոնֆերանսներին մասնակցելու նպատակը մեր հետազոտությունները ներկայացնելն է, քանի որ ցեղասպանությունը բարդ, բազմաշերտ երևույթ է, մենք դեռևս կարողանում ենք ուսումնասիրել ու վերհանել Հայոց  ցեղասպանությանը վերաբերող փաստեր, որոնք իրականում խորացնում են մեր գիտելիքը ցեղասպանության վերաբերյալ»,- ասաց Է. Գզոյանը։

Նա ընդգծեց, որ ցեղասպանությունը միայն սպանությունների մասին չէ. «Ցեղասպանության կոնվենցիայի 5 կետերը, որոնք  ցույց են տալիս, թե որ գործողությունները կարող են համարվել ցեղասպանություն, դրանցից միայն մեկն է խոսում հենց ուղղակի սպանությունների մասին։

Է.Գզոյանը տեղեկացրեց, որ իրենք տարվա ընթացքում անցկացրել են կոնֆերանս, որի ժամանակ  նշվել է՝ ըստ գիտնականների  հաշվարկների, մոտ 200 հազար հայ երեխաներ ու երիտասարդ կանայք Հայոց ցեղասպանության տարիներին բռնի ձուլվել են.  ոմանք կարողացել են  հետ վերադառնալ իրենց հայկակականությանը, բայց շատերը ձուլվել են թուրքական կամ մուսուլմանական այլ հասարակությունների։