Ձեր վստահելի աղբյուրը

«Այն վիճակը, որի մեջ հայտնվել է մեր Կիրանցը... Դարերի պատմություն ունի, իր գոյության ընթացքում միշտ  պայքարի մեջ է եղել, բայց հիմա այսպիսի իրավիճակում ենք, անորոշություն է»,- լրագրողների հետ զրույցում ասաց Կիրանցի բնակիչներից մեկը, ով շատ այլ տավուշցիների հետ փակել է Հայաստան-Վրաստան միջպետական ճանապարհը՝ դեմ լինելով սահմանազատման այն տարբերակից, որը համաձայնեցրել են Հայաստանն ու Ադրբեջանը։ 

Նա ընդգծեց, որ իրենց ցույց են տվել ուրիշ սահման, բայց գծում են ուրիշ սահման, որը գյուղի ներքևի հատվածով է անցնում։

«Ստացվում է, որ նախատեսած, իրենց ներկայացրած  սահմանից ավելի մեծ սահմաններ են ընդգրկվելու, ըստ իրենց, որպես Ադրբեջանի տարածք։ Գյուղի մի քանի տուն հայտնվում է  Ադրբեջանի հետ սահմանին։

Ասում էին՝ Հայաստանի հպարտ քաղաքացի, ապագա կա... Ուզում ենք իրենք ներկայացնեն՝ Հայաստանն ի վերջո ապագա ունի՞, թե՞ ոչ։ Ինչի՞ է այս ամենը տանում։ Կործանմա՞ն։ Հող տանք, հա, էլի՞։ Մինչև ե՞րբ տանք։ Հերիք է, էլ տեղ չկա։ Այսպես ապրելն ո՞ւմ է պետք։ Թող զենք տան, մենք պայքարենք, մեր հողը պահեն։

Ինչու, հանուն ինչի՞ են մեզ ստիպում հետ քաշվել»,- ասաց կիրանցին։
Նրա խոսքով, իրենց չի հետաքրքրում՝ կարո՞ղ են զբաղվել գյուղատնտեսությամբ, անասնապահությամբ. «Դրանք մի կողմ ենք թողնում։ Այստեղ հայրենիքի խնդիր կա»։