Ձեր վստահելի աղբյուրը

Արդեն 8 օր է Տավուշի մարզի բնակիչները, որոնց միացել են Հայաստանի այլ շրջաններից քաղաքացիներ, փակել են Հայաստան-Վրաստան միջպետական ճանապարհը՝ դեմ լինելով միակողմանի զիջումներին, սահմանազատման աշխատանքներին, որոնք նախաձեռնել են Հայաստանի կառավարությունն ու Ադրբեջանը։

Երեկ և այսօր Երևանում, տարբեր քաղաքներում նույնպես բողոքի ակցիաներ էին նույն պահանջով՝ դեմ են միակողմանի զիջումներին։

Panorama.am-ը հետաքրքրվեց քաղաքացիներից՝ արդյո՞ք հավատում են, որ սահմանազատումը բերելու է Ադրբեջանի հետ խաղաղության, ինչպես ասում են իշխանության ներկայացուցիչները։

«Թուրքի հետ ոչ մի խաղաղություն, թուրքի հետ պատերազմ, արյուն, բայց ոչ երբեք խաղաղություն»,- ասաց քաղաքացիներից մեկը։

«Խաղաղություն ծնկածոք չեն մուրում, խաղաղության համար նախ պետք է դիմացինդ խաղաղության տրամադրվի, բայց ինքն ամեն քայլափոխի հակառակն է անում»,- նշեց մեկ այլ քաղաքացի։

Քաղաքացիների գնահատմամբ, երկրում իրավիճակը սարսափելի է, միակողմանի զիջումները չի բերի խաղաղություն։

«Մենք ունենք գերիներ, Հայաստանի տարածք մտած թուրքեր։ Միակողմանի է կատարվում»,- նշեց քաղաքացին։

«Տալիս են, ուղղակի տալիս են, ժողովուրդը դեռ քնած է, չի հասկանում։ Ազգը պետք է ոտքի կանգնի։ Քանի այս ժողովրիդ մեջ կան նիկոլականներ, այս երկիրը չի դզվի։ Տավուշից հետո գալու են Ջերմուկ, Երևան։ Իզուր չէ, որ Ալիևն ասում է՝ ոտքով եմ գալու։ Ու կգա, քանի այս ղեկավարները մեր գլխին են»,- ասաց քաղաքացին։

Նրանք  համոզված են՝ նահանջել չի կարելի, բավական է ինչքան նահանջել ենք։

«Ավելի լավ է կանգնած մահանանք, քան չոքած ապրենք»,- նշեց մեր զրուցակից կինը։ 

«Երկիրը հանձելով ո՞ւր ենք հասնելու... Մինչև Երևա՞ն։  Երևանից հետո ո՞ւր ենք գնալու»,- ասաց քաղաքացին։ 

Մանրամասն՝ տեսանյութում։