Ձեր վստահելի աղբյուրը

«Քաղաքացիական գիտակցություն» ՀԿ ղեկավար, AntiFake.am կայքի հիմնադիր, «Իմնեմնիմի» փոդքասթի համահեղինակ և վարող, քաղբանտարկյալ Նարեկ Սամսոնյանը հոդված է հրապարակել «Արմավիր» քրեակատարողական հիմնարկից.

«Վերջին օրերին Հանրապետության տարբեր հատվածներում և, հատկապես, Տավուշի մարզում տեղի ունեցող պայքարը խիստ ոգևորիչ և հուսադրող է: Թշնամական երկրներից ուղղորդվող և թշնամական շահեր սպասարկող Հայաստանի կառավարիչներն այլևս չեն կարողանում արդյունավետ իրականացնել Հայաստանի Հանրապետության կործանման իրենց առաքելությունը:

Այս դավաճանների միակ հենասյունը մնացել է Օսմանյան կայսրության Ենիչերիների կորպուսը հիշեցնող, բայց ՀՀ ոստիկանության շարքերում գործող մի քանի ստորաբաժանումներ` իրենց ղեկավար Վահե Ղազարյանի գլխավորությամբ: Վերոնշյալ ստորաբաժանումների կողմից վերջին օրերի վայրագությունների կադրերը հեռուստացույցով դիտելիս (5-րդ ալիք ենք նայում) համոզմունք է ձևավորվում, որ դրանք հանուն թշնամական օրակարգի սպասարկման պատրաստ են նույն կերպ վարվել սեփական կանանց, մայրերի և երեխաների հետ:

Փողոցում ձևավորված քաղաքական առաջնորդությունը` ի դեմս Բագրատ Սրբազանի, կարողանում է չեզոքացնել դավաճանական կառավարիչների և մերօրյա Ենիչերիների կորպուսի ծառայողների սադրանքները, բայց պետք է պատրաստ լինել ճիշտ ժամանակին, վճռական և արդյունավետ գործողություններով վերջնականապես «ճեղքել» Ենիչերիների կորպուսի դիմադրությունն ու դավաճանների առաջնորդին միայնակ թողնել ժողովրդի հետ:

Հանուն Հայաստանի պահպանման պայքարի ելած քաղաքացիների դեմ բռնություն գործադրող ոչ մի ոստիկան չպետք է անպատիժ մնա ապագայում, և միայն այս գիտակցումն է, որ վերջիններիս համար զսպօղակ կարող է հանդիսանալ: Դավաճանական ռեժիմի պարագլուխն այս նոր ձևավորվող ցասման ալիքի հետևանքով պետք է միայնակ մնա և դուրս վռնդվի իշխանությունից և իր արժանի տեղը զբաղեցնի «Երևան» ՔԿՀ-ում որպես պետական դավաճան:

Լիահույս եմ, որ սկիզբ առած ապակենտրոն պայքարն իր առաջնորդներով կարողանալու է շատ կարճ ժամանակում Հանրապետության ողջ տարածքը լցնել պայքարող քաղաքացիներով և ի վերջո ազատել Հայաստանը թշնամական կառավարումից:

Անձնազոհություն, վճռականություն, հաղթանակ: Աստված պահապան Հայաստանի Հանապետությանն ու հայ ժողովրդին:

Քաղբանտարկյալ Նարեկ Սամսոնյան
«Արմավիր» ՔԿՀ
27.04.2024»: