Ձեր վստահելի աղբյուրը

Փաստաբանական խումբը հայտարարություն է տարածել, որում ասվում է․

«Այսօր մամուլում լայն քննարկում է ստացել Արթուր Սուքոյանի մասնակցությամբ դեպքը: Հարցի բարոյական կողմը թողնելով այդ հարթության վրա և ընդունելով Արթուր Սուքոյանի  թեզերի արդարացիությունը՝ ցանկանում ենք շեշտադրել, որ Ա. Սուքոյանի արարքում բացակայում է հանցակազմը: Այսօր փորձ է արվել տարատեսակ դատավարական աճպարարությունների միջոցով ստեղծել կալանավորման հիմքեր, սակայն դրանք բարեհաջող տապալվել են, քանի որ Արթուր Սուքոյանը ինքնուրույն ներկայացել է իրավապահ մարմիններ, սակայն արդեն հնչեցված պատճառաբանությամբ այստեղ  հրաժարվել են մեզ ընդունել: Այս պահին Արթուր Սուքոյանը ազատության մեջ է:

Փաստաբաններ՝

Էրիկ Ալեքսանյան,

Ալեքսանդր Կոչուբաև»։

Ավելի վաղ հայտնել ենք, որ իշխանական «Սիվիկ» լրատվականի լրագրող Դավիթ Լևոնյանն այսօր ԱԺ-ում իր նկատմամբ բռնություն  կատարելու վերաբերյալ հաղոդում է ներկայացրել ՆԳՆ ոստիկանություն։ Իրավապահ այս մարմինն էլ կազմված փաստաթղթերն  ուղարկել է Քննչական կոմիտե։

ՔԿ խոսնակ Գոռ Աբրահամյանը Panorama.am-ին հայտնեց, որ ոստիկանությունից հաղորդումը ստացել են, այժմ ուսումնասիրում են քրեական վարույթ հարուցելու հիմքերը։

Հիշեցնենք, որ այսօր տեղեկություններ տարածվեցին, որ ԱԺ «Հայաստան» խմբակցության պատգամավոր Լևոն Քոչարյանի օգնականը բռնություն է կիրառել Դավիթ Լևոնյանի նկատմամբ։

Վերջինը նախօրեին մի տեսանյութ էր հրապարակել ու պատմել, որ իբր Բագրատ Սրբազանը միլիոններ է ստացել դրսից։

Ի պատասխան Տավուշը հանուն հայրենիքի նախաձեռնությունը իրավապահ մարմիններին ներկայացրել է հանցագործության մասին հաղորդում։ Դատախազությունից  Panorama.am-ին հայտնեցին, որ հրապարակումն ուսումնասիրում են։