Ձեր վստահելի աղբյուրը

«Անօրինական սահմանագծում է տեղի ունենում, որը հակասում է միջազգային պրակտիկային ու մեր Սահմանադրությանը»,-այս մասին Տավուշում լրագրողների հետ զրույցում ասաց ՀՀ նախկին վարչապետ Վազգեն Մանուկյանը։

Նա նշեց, որ Նիկոլ Փաշինյանը ասես մեր պետության սեփականատերը լինի, կարող է որոշել՝ որ կտոր հողը ում տա, ում չտա։  Ըստ նրա, կարևոր է, ժողովուրդը կանգնած պայքարում է իր իրավունքների համար, որոնք նաև ամբողջ Հայաստանի իրավունքներն են։

«Բերվում են փաստարկներ, որ եթե մենք չտանք այն, ինչ Ադրբեջանը համարում է իրենը, ապա նա պատերազմ կսկսի։ Մի կողմից Հայաստանը հայտարարվում է, որ  ուզում է կնքել խաղաղության պայմանագիր, որպեսզի խաղաղ ապրի, բայց Ադրբեջանը լրիվ ուրիշ խնդիրների մասին է  խոսում։

Ինքը խոսում է Հայաստանի մասին՝ որպես Արևմտյան Ադրբեջան, ինքը նպատակ ունի ամրապնդվել մեր բարձունքների վրա, որպեսզի շարունակի իր ընթացքը։ Մեր ամեն զիջումը բերում է պատերազմի վերսկսման ավելի մեծ հավանականության, քան չզիջելը։

Անդառնալիության կետը հատված չէ, եթե ժողովուրդը միասնական որոշում է  ընդունում, այդ որոշմանը շատ դժվար կլինի դեմ գնալ»,- ասաց նա։

Վ.Մանուկյանի խոսքով, միջազգային մթնոլորտն այնպիսին է, որ Ադրբեջանն այս պահին պատերազմ չի կարող սկսել։

«Արցախի տեղահանման ու  ագրեսիայի հետևանքով առաջացած միջազգային կարծիքը, Պաղեստին-Իսրայել համակարտությունը նրա համար բարենպաստ պայմաններ չեն ստեղծում պատերազմ սկսելու համար։ Ինքն իր ծրագիրը հիմա իրականացնում է  Նիկոլ Փաշինյանի ձեռքերով՝ գալ, տիրանալ հայկական հողերին, հետո հեշտ դիրքերից շարունակել  նվաճումը»,- ասաց ՀՀ նախկին վարչապետը։

Ըստ Վ.Մանուկյանի, հարցի լուծումը Երևանում,  բայց Երևանում կարող է հարցը լուծել միայն այն դեպքում, երբ  ժողովուրդն իր իրավունքի համար պայքարի։

«Շատ կարևոր է, որ ժողովուրդն այստեղ իր հղոի վրա կանգնած է և շատ կարևոր է, որ սրան զուգահեռ Երևանում կազմակերպվեն քաղաքական ուժերի, հասարակության տարբեր շերտերի մի համախմբում, որը մինչև վերջ տանի այս պայքարը»,- ասաց Վազեն Մանուկյանը։