Ձեր վստահելի աղբյուրը

«Այս գործը չի բացահայտվել, այս գործի բոլոր հանգամանքները հասու չեն մեր հասարակությանը։ Մենք գիտենք այնքան, ինչքան գիտեինք  2023 թվականի հունվարի 20-ին»,- Հանրապետության հրապարակում լրագրողների հետ զրույցում ասաց Ազատ գյուղի կացարանում հրդեհից զոհված  զինծառայողների հարազատների ներկայացուցիչ Նորիկ Նորիկյանը։ 

Ըստ նրա, այստեղ ամենակարևոր  հարցն է՝ հրդեհին  հաջորդող ժամանակահատվածում ինչո՞ւ զինծառայողները չեն ձեռնարկել համապատասխան միջոցներ այդ տարածքից դուրս գալու համար։

«Քաղաքական պատասխանատվությունը  կրում է  գործադիր իշխանությունը վարչապետի գլխավորությամբ»,- ասաց փաստաբանը։

Զինվորական կացարանի հրդեհից զոհված Արամ Մանուկյանի պապիկը՝ Արտյոմ Գրիգորյանն ասաց. «Փաշինյանը պետք է անպայման պատասխան տա մեր երեխաների սպանության համար։ Նա առաջին ժամին ասաց երեխաները վառվել են, ասաց ու փակեց։ Դո՞ւ ինչ գիտեիր, որ վառվել էին, դու տեսե՞լ էի այդ երեխաներին, ո՞նց էին վառվել կամ ի՞նչ աստիճանի էին վառվել»։

Ազատ գյուղի զինվորական կացարանի հրդեհից զոհված զինծառայող Հայկ Կիրակոսյանի հայրը՝ Գաբրիել Կիրակոսյանն ասաց, որ Հանրապետւթյան հրապարակում հավաքված զինծառայողների ծնողները ՀՀ իշխանությանը և իրավապահ համակարգին մինչև մայիսի 10-ը ժամանակ են տալիս որոշ անձանց կալանավորելու համար։

«Անուններով կարող եմ ասել, բայց որոշ բաներ հաշվի առնել՝ չեմ ասի։ Եթե ամիս 10-ին դատի գնացինք ու իմացանք քրեական հետապնդում չի հարուցվել տվյալ մարդկանց նկատմամբ կալանքի վերացնելու համար, դրանից հետո մեզ միանալու են բոլոր ծնողները՝ հարազատներով, ընկերներով, շատ մեծ քանկությամբ գալիս ենք անհարմարություներ ստեղծելու իրենց համար։

Այս 15 երեխաների սպանությունն անհայտ պայմաններում խաղ ու պար չէ իրենց համար, որ մուտիլովկաներով փակեն։ 

Ամեն մեկն իր հերթին մաքիսմալ չափով ինչքան կարողանում է, այս  գործը ձգձգում է»,- ասաց Գ.Կիրակոսյանը։ 

Հիշեցնենք, որ 2023 թ. հունվարի 19-ին՝ ժամը 01:30-ի սահմաններում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետևանքով զոհվել է 15 զինծառայող։

Նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ) և վարույթ՝ ՔՕ 550-րդ հոդվածի 3-րդ մասով (զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ), որը կցվել է մայր վարույթին։

Ողբերգությունից ժամեր անց  Նիկոլ Փաշինյանը կառավարության նիստում ներկայացրել էր պաշտոնական վարկածը, ըստ որի սպան բենզին է լցնել վառարանի մեջ ու երբ  կրակն անցել է  իրեն, ինքնապաշտպանական բնազդով այդ 5 լիտրանոց բենզինով տարան շպրտվել է  զորամասի կացարանի ուղղությամբ, ինչն էլ հրդեհի պատճառ է դարձել։ Զոհված զինծառայողների ծնողները չեն հավատում այս վարկածին:

Փաստաբանի խոսքն ամբողջությամբ՝ տեսանյութում։