Ձեր վստահելի աղբյուրը

«Մեր բանակի մեծագույն խնդիրներից մեկն այն է, որ մեր զինվորներն իրենց ծառայության մեծ մասն անցկացնում են խրամատի մեջ, այսինքն՝ իրենք նույնիսկ չեն հասցնում նորմալ պատրաստվել որպես զինվոր»,-Հանրային հեռուստաընկերության «Հարցազրույց» հաղորդման ժամանակ նշեց Նիկոլ Փաշինյանը։

Նրա խոսքով՝ զինվորը պետք է լինի մշտական տեղակայման վայրում, լինի մոբիլ և երբ անվտանգության խնդիր կա՝ գնա այդ խնդիրը լուծի, ապա վերադառնա զորամաս։

«Ընդհանրապես՝ զինվորն ի՞նչ գործ ունի սահմանին կանգնած»,- հարց հնչեցրեց Փաշինյան։

Նա հայտարարեց, թե բանակի և զինվորի նկատմամբ անարդար են վարվում,  ինչքան բեռ կա՝ հերթով դնում են նրա վրա և դիվանագիտության, և տնտեսության, և անվտանգության։

«Իրականում զինվորը և բանակն անվտանգության ապահովման վերջին գործոնն են»,-հայտարարեց Փաշինյանը:

Նա հայտնեց, որ Տավուշում սահմանային որոշ հատվածներում ՊՆ-ի դիրքերը պետք է հանվեն և դրա փոխարեն լինեն ԱԱԾ սահմանապահ ստորաբաժանումները։

Մեզ մնում է ենթադրել, որ Փաշինյանը կա՛մ տեղյակ չէ Ադրբեջանից պարբերաբար խնչող ուժի կիրառման սպառնալիքների մասին, կամ շարունակում է հետևողականորեն բացել երկրի դռները թշնամու զորքերի առաջ։