Ձեր վստահելի աղբյուրը

«Մեր օրակարգը հաշտության մասին է և մենք բոլոր հնարավոր հարթակներում հայտարարում ենք, որ այն մարդը, ով բախում կհրահրի և բռնության կոչ կանի շատ կոպիտ պետք է հեռացվի մեր շարքերից»,-Կիրանց-Երևան երթի ժամանակ հայտարարեց «Հայկական պետականության համար» համակարգող կենտրոնի հիմնադիր, քաղաքագետ Սուրեն Պետրոսյանը։

Հիշեցնելով, որ այսօր տարածված ձայնագրություններում խոսովում է զենքի մասին, Պետրոսյանն ասաց, որ դրանով պետք է զբաղվի Ազգային անվտանգության ծառայությունը, քանի որ այն իր մեջ ահաբեկչական բնույթ է կրում և շարժման հետ աղերս չունի։

«Նման մարդկանցով պետք զբաղվի ԱԱԾ-ն և՝ անհապաղ, նման մարդիկ շարժման հետ  որևէ կապ չեն կարող ունենալ, բացառված բան է»,-հայտարարեց քաղաքագետը։

Անդրադառնալով մեղադրանքներին թե ինքը Ռուսաստանի գործակալ է և շարժում սկսելով ցանկանում են Հայաստանում իրականացնել Արցախի սցենարը՝ Պոտրոսյանը հայտնեց, որ մի քանի ամիս առաջ էլ իրեն մեղադրում էին Արևմուտքի գործակալ լինելու մեջ և դա անում են այն ուժերը, որոնք միակողմանի զիջումներով Հայաստանը հանձնում են թշնամուն։

«Թուրքի առաջ ճանապարհ բացելու համար հայ զինվոր է վիրավորվել, սա որևիցե կերպ տրամաբանության մեջ չի տեղավորվում»,-ասաց նա՝ անդրադառնալով ականազերծման ժամանակ հայ զինծառայողի վիրավորման դեպքին։