Ձեր վստահելի աղբյուրը

ՀԱԵ Տավուշի թեմի առաջնորդ Բագրատ արքեպիսկոպոս Գալստանյանի առաջնորդությամբ մայիսի 4-ից Կիրացից սկսված քայլերթին այս օրերի ընթացքում միացել են Հայաստանի տարբեր շրջաններից բազմաթիվ քաղաքացիներ։ Նրանց բոլորին միավորում է հանուն հայրենիքի պայքարը, իշխանությունների՝ միակողմանի զիջումների դեմն առնելու պատրաստակամությունը։

Panorama.am-ը հետաքրքրվեց քաղաքացիներից, թե ի՞նչ ակնկալիքներ ունեն այս գործընթացիցի։ Պարզվեց՝ Երևանում շատերն են սպասում մայիսի 9-ին՝ դիմավորելու քայլերթի մասնակիցներին մայրաքաղաքում։

«Մենք գնալու ենք Բագրատ Սրբազանի հետևից։ Կողմ եմ միայն Բագրատ Սրբազանին»,- ասաց մի երիտասարդ։

«Նորմալ չէ, որ մենք Տավուշն էլ կորցնենք։ Տեղից մի բուռ ենք մնացել։ Պետք է միանանք Բագրատ Սրբազանին, այլապես կործանվելու ենք»,- շարունակեց մեկ այլ քաղաքացի։

Քաղաքացիները ցանկանում են, որ քայլերթն իր արդյունքը տա, սակայն մեծ ակնկալիքներ չունեն։

«Մեր երկիրը հիմա նման գործողության կարիք ունի։ Շատ կուզենք ինչ-որ բան փոխվի, ինչ-որ բան վերանայվի, սակայն մեծ ակնկալիքներ չունենք, երբ որ մեր ողջ ուժային կառույցներն այս մարդկանց վերաբերվում են ուրիշ ձևի»,- ասաց քաղաքացիներից մեկը։

Կան քաղաքացիներ, որոնք չեն հասկանում քայլերթի իմաստը, կարծում են, որ եկեղեցին քաղաքականության հետ գործ չունի։ 

«Անիմաստ քայլ է։ Ժողովուրդն ապրում է, պատերազմից պրծել ենք։ Ի՞նչ են ուզում։ Բան ու գործ չունե՞ն»,- ասաց քաղաքացիներից մեկը։

Մանրամասն՝ տեսանյութում։