Ձեր վստահելի աղբյուրը

Արդեն 16 օր է «Զվարթնոց» օդանավակայանում շարունակում է հացադուլ իրականացնել ռազմական և հետաքննող ֆրանսահայ լրագրող  Լեո Նիկոլյանը: Նա օդանավակայանի չեզոք գոտում է։

Panorama.am-ի հետ զրույցում  Լեո Նիկոլյանն ասաց, որ օդանավակայանի բժշկական խումբն ամեն օր ստուգում է արյան ճնշումը, սրտի աշխատանքը։ Նա պատմեց, որ օրեր առաջ շատ վատ է եղել, կանչել են շտապօգնություն. «Բժիշկները միայն «կոֆեին» էին սրսկել` ցածր ճնշումս բարձրացնելու համար»։

Նշենք, որ Լեո Նիկոլյանն արդեն դժվարությամբ է խոսում։

Ֆրանսիայի քաղաքացի Լեո Նիկոլյանն ասաց, որ Հայաստանում Ֆրանսիայի դեսպանությունից այս օրերին որևէ մեկը չի այցելել իրեն։

«Հյուպատոսի աշխատանքի մեջ է մտնում գա,  տեսնի իր քաղաքացին ինչ խնդիրներ ունի, ինչ վիճակում է, ինչ խորհրդի կարիք ունի։  Չի եկել, չի էլ գա։ Ներսից եմ իմացել՝ ինքն ուզում է գալ, սակայն Հայաստանում Ֆրանսիայի դեսպանը  խիստ ձևով արգելում է նրա այցը օդանավակայան։ Դա մեծ խայտառակություն է։ Ասում են Ֆրանսիան մարդու իրավունքների երկիր է։ Իրականությունն այլ է։ Ավելի խայտառակ է լինում, երբ այսօր Հայաստանի Ազգային ժողովի պատգամավոր Արծվիկ Մինասյանը գալիս է ինձ տեսնելու, Հայաստան խմբակցության պատգամավոր Սեյրան Օհանյանն այդ մասին է խոսում Ազգային ժողովում»,- նշեց Նիկոլյանը։

Նա ասաց, որ ՄԻՊ գրասենյակից հացադուլի երկրորդը օրը եկել են, տեսել են, գնացել, դրանից հետո արդեն անցել է 13 օր, ոչ հետ են եկել, ոչ հետ են զանգել։

Հիշեցնենք, որ ֆրանսահայ լրագրող Լեո Նիկոլյանին ապրիլի 22-ին Զվարթնոց օդանավակայանում թույլ չեն տվել մուտք գործել ՀՀ՝ պատճառաբանելով, թե իր մուտքը ՀՀ արգելված է։ Ի նշան բողոքի՝  Լեո Նիկոլյանը հացադուլ է հայտարարել՝ պահանջելով, թե ինչ հիմքով է արգելվում իրեն մուտք գործել հայրենիք:

«Պատասխանել են, որն անիմաստ ու անլուրջ եմ համարում, արգելված է իմ մուտքը Հայաստան, քանի որ կարող է վտանգավոր անձնավորություն լինեմ Հայաստանի Հանրապետության համար։ Ես համոզված եմ, որ պատճառն այն է, որ մոտ մեկուկես ամիս առաջ գնացել էի Ոսկեպար։ Երեք շաբաթ այնտեղ եմ ապրել՝ հասկանալու իրավիճակը։ Երևի իմ սյուժեներն իրենց դուր չի եկել ու առիթ են գտել արգելելու իմ մուտքը Հայաստան։ Իմ գործն 1986 թվականից անում եմ չեզոք, օբյեկտիվ, ճշմարիտ։

Ես այստեղից չեմ գնա, չեզոք գոտում կարող եմ իմ ամբողջ կյանքն ապրել։  Չեմ դադարեցնելու հացադուլը, մինչև ԱԱԾ-ն կամ կառավարությունը չապացուցի, ինչի հիմքով ու ինչ փաստով են արգելել իմ մուտքը Հայաստան։

Շատ հնարավոր է ես այստեղ մեռնեմ, քանի որ առողջական լուրջ խնդիրներ ունեմ սրտի, թոքի հետ կապված։ Եթե այդպես է՝ որոշել եմ ավելի լավ է այստեղ մեռնեմ, որտեղ լուսամուտից երևում է Արարատը, քան գնամ ու մեռնեմ Փարիզում։

Գիտեմ, որ Նիկոլ Փաշինյանը վաղը գնում է  Մոսկվա։ Իր ինքնաթիռը երևում է այստեղից։ Կարող է այցելել ինձ, բարևել, ես իրեն սուրճ կհյուրասիեմ, կխոսենք, կքննարկենք»,- ասաց Լ.Նիկոլյանը։