Ձեր վստահելի աղբյուրը

Հանրապետության հրապարակում ընթացող «Տավուշը հանուն հայրենիքի» շարժման հանրահավաքին  «Ջենեսիս Արմենիա» ուղեղային կենտրոնի տնօրեն Աբրահամ Գասպարյանն իր ելույթը սկսեց Ադրբեջանի նախագահ Իլհամ Ալիևի հայտարարությամբ, ըստ որի՝ «այսօր առանց մեկ կրակոցի մեզ վերադարձվեցին Ղազախի չորս գյուղեր։ Այդպես լինելու է նաև հետագայում։ Սահմանազատումն ու սահմանագծումն իրականացվում է մեր պայմաններով, և սա մեր հերթական հաղթանակն է»։

«Եթե հայ ժողովուրդը ասում է  ոչ հանձնվողականությանը, պարտվողականությանը, այլ՝ այո հայկական ինքնության պահպանմանը, անվտանգ ու զարգացած Հայաստանին, ուրեմն այդպես էլ կլինի։
Ավարայր կերտած, Սարդարապատ կերտած, Շուշի կերտած հայ ժողովուրդը ծնկի չի գա և չի գալու: Այս շարժումն ունի մեկ վերնագիր Հայաստան և մեկ դրոշ՝ կարմիր, կապույտ, ծիրանագույն։

Մեզ ասում են՝ պատերազմ եք բերում, և սա ասում է  մի ոհմակ, որը վերջին 4 տարում 4 պատերազմ է  բերել հայ ժողովրդի գլխին՝ Արցախի կորստից սկսած մինչև Սյունիք, այսօր էլ Տավուշ»,- ասաց նա։

Ա.Գասպարյանի խոսքով, Բագրատ Սրբազանը գլխավարում է հավաքական առաջնորդության այն գաղափարը, որ ի սկզբանե դրված է եղել այս շարժման ակունքներում. «Մեզ հարցնում են՝ ի՞նչ ծրագրեր ունեք որո՞նք ենք հաջորդ քայլերը։ Նախ, մեկ հիշեցում, Սրբազան հայրը երեկ պարզ նշեց՝ մեկ շաբաթ, 10 օր, իսկ հայրենիքի ազատագրության դատին արդյո՞ք պետք է զլանանք ևս 10 օր պայքարել, պատրա՞ստ եք այդ 10 օրը մինչև վերջ գնալու»։

Հրապարակում հավաքված հազարավոր քաղաքացիները դրական արձագանքեցին։

«Իմ ժողովուրդ, մենք ձեզ ծառա, մենք ձեզ զինվոր, այս պայքարը գեթ մեկ անգամ արժանապատիվ ձևով մինչև տրամաբանական և հաղթական ավարտը հասցնելու։

Կազմակերպված և կարգապահ օգնեք մեզ Սրբազան հոր առաջնորդած այս շարժումը հասցնենք իր բաղձալի նպատակին, իսկ նպատակը մեկն է՝ բոլորս միասին ասում ենք մեր 4 հենակետային արժեքները, որոնցից ոչ մի գնով պատրաստ չենք հրաժարվել՝ հայ, Հայաստան, հայրենիք ու Աստված»,- ասաց Աբրահամ Գասպարյանը։