Ձեր վստահելի աղբյուրը

«Այսօր մեր մի պահանջով մեզ վերադարձվեցին Ղազախի չորս գյուղեր։ Այդպես լինելու է նաև հետագայում»,-այսօր Ադրբեջանի զինված ուժերի կողմից օկուպացված Շուշիում հայտարարել է Իլհամ Ալիևը։

Նա հայտարարել է, որ խոսքի իրավունքն Ադրբեջանին  է պատկանում։

«Մենք առաջատար պետությունն ենք Կովկասում, մենք առաջատար պետություն ենք տնտեսական, քաղաքական, ռազմական առումներով, բոլոր առումներով, բոլորը պետք է հաշվի նստեն մեզ հետ»,-ասել է նա։

Ալիևն ընդգծել է, որ այսօր Ղազախի հողերը հանձնվում են առանց մի կրակոց արձակելու։

«Սահմանազատումն ու սահմանագծումն իրականացվում է մեր պայմաններով, և սա մեր հաջորդ հաղթանակն է»,- ասել է Ալիևը։

Թշնամի երկրի ղեկավարը գործընթացի դեմ պայքարողներին որակել է ռևանշիստներ.

«Եթե այսօր տեսնենք, որ Հայաստանում ռեւանշիստները գլուխ են բարձրացնում, որ Ֆրանսիան Հայաստանին մահաբեր զենք է տալիս, եթե տեսնենք, որ այդ զենքերը հասել են կրիտիկական աստիճանի, ապա թող ոչ ոք մեզանից չնեղանա։ Բոլորը գիտեն, թե մենք ինչի ենք ընդունակ, ինչի է ընդունակ մեր բանակը և որքան ուժեղ է մեր կամքը։ Մեզ ոչ ոք չի կարողանա դիմակայել»։