Ձեր վստահելի աղբյուրը

«Հրապարակ» թերթը գրում է.

«Երևանի քաղաքապետ Տիգրան Ավինյանի և փոխքաղաքապետ Սուրեն Գրիգորյանի հարաբերությունները լարվել են, Գրիգորյանը ձախողել է հասարակական տրանսպորտի միասնական տոմսային համակարգի ներդրման գործընթացը, ինչը Տիգրան Ավինյանի նախընտրական խոստումն էր, եթե չասենք՝ այն ներկայացվում էր որպես աննախադեպ ռեֆորմ։ Ավելի քան մեկ տարի է անցել կնքված պայմանագրից՝ համաձայն որի, գործընթացը պետք է կյանքի կոչվեր, բայց դեռ ոչինչ չի արվել։

Մենք գրել էինք, որ կան տեխնիկական բազում խնդիրներ․ մրցույթը շահած միակ ընկերությունը՝ «Թել Սել» ՓԲԸ-ն, պայմանագրով նախատեսված պարտականությունների՝ ընթացակարգային համապատասխանեցում սահմանված ժամկետներում չի իրականացրել, այնպիսի սարքեր չեն տեղադրվել փոխադրամիջոցներում, որ հնարավոր լինի ոչ միայն Թել-Սել համակարգով օնլայն վճարումներ կատարել, այլև բանկային քարտերով և հեռախոսային այլ հավելվածներով։ Բոլոր հիմքերը կան՝ լուծելու պայմանագիրը, սակայն Տիգրան Ավինյանը չի գնում դրան, որ դուրս չգա, թե խաբել է երևանցիներին և համակարգը չի գործելու։

Հակառակը՝ ամեն գնով փորձում է կյանքի կոչել միասնական տոմսային համակարգը և դեռ ամիսներ առաջ հանձնարարել էր փոխքաղաքապետ Սուրեն Գրիգորյանին, որն ի սկզբանե այս գործարքի կուրատորն է եղել, Կենտրոնական բանկի հետ բանակցել և սեղմ ժամկետում գլուխ բերել համապատասխանեցման գործընթացը։

Սակայն ԿԲ-ն առանձնապես խանդավառված չէ այդ գործընթացից, քանի որ քաղաքապետարանի և հիշյալ ընկերության միջև կնքված պայմանագիրը բազմաթիվ խութեր է պարունակում։ Բացի այդ տեղեկացանք, որ ԿԲ-ից գլխի են քցել՝ եթե  QR կոդի տեսքով անժամկետ տոմսեր վաճառեն, ցանկացած մեկը կարող է պատճենել կոդը, հարյուր հոգու տալ ու նրանք էլ օգտագործեն։ Ավինյանը հասկացել է, որ «պռավալ» է գնում ողջ գործընթացը, Սուրեն Գրիգորյանի առջև հարց է դրել՝  կամ գոնե QR համակարգի անվտանգությունը ապահովել ու վերջապես գործընթացը կյանքի կոչել/ նշենք, որ միասնական տոմսային քարտեր կգործեն QR կոդով/,  կամ իր փոխքաղաքապետի պաշտոնը կասկածի տակ կդրվի»։

Մանրամասները թերթի այսօրվա համարում։