Ձեր վստահելի աղբյուրը

«Ձեր այս այցն առավել քան սպասված է, հաշվի առնելով, թե՛ անմիջականորեն Հարավային Կովկասում ԵԱՀԿ ներգրավվածության մեխանիզմների շուրջ  քննարկումների արդիականությունը, թե՛ ընդհանուր առմամբ ԵԱՀԿ պատասխանատվության գոտում առկա մարտահրավերները»,- ԵԱՀԿ գործող նախագահ, Մալթայի Հանրապետության արտաքին ու եվրոպական հարցերի և առևտրի նախարար Իեն Բորջի հետ համատեղ ասուլիսում հայտարարեց  ՀՀ ԱԳ նախարար Արարատ Միրզոյանը:

Նա կարևորեց կազամկերպության պատասխանատվության գոտում ԵԱՀԿ գործիքակազմով առկա խնդիրների հասցեագրում։

Հայտնելով, որ Հարավային Կովկասն էլ զերծ չէ լրջագույն մարտահրավերներից՝ Միրզոյանն ասաց. «Դրանք խաթարում են ԵԱՀԿ այնպիսի առանցքային սկզբուննքներ, ինչպիսիք են,  պետությունների տարածքային ամբողջականությունը և ինքնիշխանությունը»։

Միրզոյանը հայտնեց, որ այդ խնդիրներն ուղղակիորեն առնչվում են ԵԱՀԿ մանդատին և պահանջում են կառույցի հասցեական ներգրավվածություն դրանց լուծմանը։

Նախարարն ասաց, որ հանդիպման ժամանակ գործընկերոջը ներկայացրել է Հարավային Կովկասում անվտանգային իրավիճակը, Հայաստանի և Ադրբեջանի միջև բանակցային գործընթացի վերջին փուլի զարգացումները, նաև Ալմաթիում տեղի ունեցած բանակցությունների մանրամասները։

«Այս համատեքստում ընդգծել եմ ապրիլի 19-ին երկու երկրների սահմանագծման և սահմանային անվտանգության հանձնաժողովների կողմից ամրագրված պայմանավորվածությունն առ այն, որ սահմանազատման գործընթացի քաղաքական հիմքը պետք է լինի 1991 թվականի Ալմա-Աթայի հռչակագիրը»,-ասաց Միչզոյանը՝ նշելով, որ այն հերթական ամրագրումն էր այն բանի, որը բազմիցս արձանագրել էին երկու երկրների ղեկավարները։

Նա հիշեցրեց, որ այդ սկզբունքն առաջին անգամ հաստատվել  է 2022 թվականին՝ Պրահայում։

«Այս սկզբունքի ամրագրմամբ և խաղաղության պայմանագրի կնքմամբ կարող է վերջ դրվել երկարամյա այս հակամարտությանը և կայուն և երկարատեր խաղաղություն հաստատվել տարածաշրջանում»,-հայտարարեց Արարատ միրզոյանը։

Իեն Բորջը հայտարարեց, որ ԵԱՀԿ-ի համար սկզբունքային և կարևոր խնդիր է Հայաստանի և Ադրբեջանի միջև երկարատև և կայուն խաղաղություն հաստատելը և ինքը Երևանում լսածը կփոխանցի Բաքվին։

«Դուք կարող եք հուսը դնել մեր աջակցության վրա, ճիշտ այնպես, ինչպես մենք կարող ենք ձեր վրա հուս դնել»,-Արարատ Միրզոյանին դիմեց Իեն Բորջը։

Պատասխանելով հարցին, թե արդյոք ԵԱՀԿ-ն փակել է Արցախի հարցը և բռնագաղթած արցախցիների վերադարձի հարցն ինչպես պետք է լուծվի՝ Բորջը նշեց, որայդ հարցը երկու երկրների լուծելիք խնդիրն է․