Ձեր վստահելի աղբյուրը

ՍիվիլՆեթ անկախ լրատվամիջոցի  փաստերի ստուգման թիմը՝ #CivilNetCheck-ը, «Շաբաթվա ֆեյքերը» հաղորդման շրջանակում ներկայացրել է ֆեյսբուքյան տասնյակ էջեր, որոնք ծախսում են հազարավոր դոլարներ հակաքարոզչություն  տարածելու համար։

Աղբյուրը նշում է, որ Տավուշից մեկնարկած սահմանազատման ցույցերին զուգահեռ Հայաստանում ակտիվացել են տարբեր ֆեյսբուքյան էջեր, որոնք ակնհայտ հակաքարոզչություն ու դավադրապաշտական թեզեր են տարածում «Տավուշը հանուն հայրենիքի» շարժման և դրա առաջնորդ Բագրատ արքեպիսկոպոս Գալստանյանի դեմ։

Հակաքարոզչությունն ավելի մեծ թվով մարդկանց հասցնելու համար գործի է դրվում ֆեյսբուքի գովազդի ծառայությունը, ինչի վրա հազարավոր դոլարներ են ծախսվում։

#CivilNetCheck-ը պարզել է՝ ինչ էջեր են դրանք, ովքեր են կանգնած դրանց հետևում, ինչ են տարածում։

Դրանք հիմնականում տարածում են, որ Բագրատ Սրբազանի հետևում Ռուսաստանն է կանգնած՝ Պուտինի գլխավորությամբ, Տավուշում սկիզբ առած այս շարժումը Կրեմլի՝ Հայաստանի անկախության դեմ նոր պատերազմն է։ Նշում են, որ շարժման թաքնված շահառու է ՀՀ երկրորդ նախագահ Ռոբերտ Քոչարյանը։

Անկախ լրատվամիջոցն արձանագրում է, որ այս էջերից որոշներն ակտիվ էին 2023 թ. Երևանի ավագանու ընտրություններից առաջ ու նման լուրեր էին տարածում ՔՊ թեկնածուի հիմնական մրցակից, Երևանի նախկին քաղաքապետի Հայկ Մարությանի մասին։

Նման էջերից են Armenian News-ը։ Դրանում արված գրառումների վրա գովազդ է միացվել, երկու օրում ծախսվել է մոտ 800 դոլար։ Թիրախում ֆեյսբուքի ու ինսթագրամի օգտատերերն են։ ՔՊ-ի հետ հստակ կապ ունեցող «Ճիշտը», Cnews էջերը ևս ակտիվ տարածում են այդ թեզերը։

««Ճիշտը» էջը ակտիվ էր Երևանի քաղաքապետի ընտրությունների ընթացքում, հետո լուռ էր։ Հիմա թիրախում Բագրատ Սրբազանն է։ Այս էջը պատկանում է Երևանի ավագանու «Իմ քայլը» խմբակցության նախկին անդամ  Վիլեն Գաֆեսջյանին»,-նշում է աղբյուրը։

Ակտիվ են նաև «Աշխարհի հայեր», HAY News, New Armenia Blog, Armenian Zone էջերը, որոնք ակնհայտ քարոզչություն են իրականացնում շարժման ու Բագրատ Սրբազանի դեմ։ Գրառումները գրեթե նույնաբովանդակ են, էջերը հաճախ են օգտվում ֆեյսբուքի վճարովի գովազդներից՝ ավելի մեծ օգտատերեի հասնելու ու այդ թեզերը տարածելու համար։ Նույն կենտրոնից համակարգումը երևում է նաև «ԱՐՄԵՆԻԱ», «Զարմանալի Աշխարհ», ArmenaNews, Medianews էջերի դեպքում։

«Այս էջերը կապված են վարչապետի աշխատակազմի ղեկավարի տեղակալ Տարոն Չախոյանի հետ, որը մինչ ներկայիս պաշտոնը զբաղեցնելը բլոգեր էր։ Էջերն ունեն մեծ թվով հետևոդներ, գրեթե միաժանակ տարածում են նույն բովանդակությունը՝ վերցված միմյանց էջերից։ Դրանք թիրախավորում են ցույցի մասնակիցներին, ժամանակ առ ժամանակ էլ տարածում ու շրջանառում են կեղծ լուրեր։ Այսպիսով շուրջ երկու տասնյակ էջերի միջոցով հազարավոր դոլարներ են ծախսվում Բագրատ Սրբազանի ու նրա առաջնորդած շարժման դեմ դավադրապաշտական ու թիրախավորող բովանդակություն տարածելու համար։ Այս թեզերը հստակ իշխանամետ են, տարածվող նույնական թեզերն ու վարքագիծը կարող են վկայել, որ դրանք կառավարվում են մեկ կենտրոնից»,-նշում է աղբյուրը։

Ստացվում է, որ Հայաստանում իշխանությունն օգտագործում է ֆեյսբուքյը զրպարտություն ու կարծիքների բևեռացում տարածելու նպատակով։