Ձեր վստահելի աղբյուրը

Երևան քաղաքում և մարզերում տեղի են ունեցել անհնազանդության ակցիաներ։ Այս մասին  «Տավուշը՝ հանուն հայրենիքի» շարժման այսօրվա ամփոփ տեղեկություն ներկայացնելով ասաց «Հայաստան» խմբակցության պատգամավոր  Գառնիկ Դանիելյանը՝ Սուրբ Աննա եկեղեցու բակում։

«Օրվա ընթացքում փակվել են Երևանում ՝ Նալբանդյան-Սայաթ Նովա խաչմերուկը, Աբովյան փողոցը 5 կետերով, Երվանդ Քոչար, Մոսկովյան, Հանրապետության , Տերյան փողոցները, Թումանյան-Խանջյան խաչմերուկը, Եղվարդի խճուղին։ Արմավիրում, Գյումրիում ևս իրազեկման ակցիաներ են իրականացվել։ Լոռու մարզում իրականացվել են իրազեկման ավտոերթեր։ Իրազեկման ակցիաներ են իրականցվել նաև մետրոպոլիտենի կայարաններում»,- տեղեկացրեց Գառնիկ Դանիելյանը՝ հավելելով, որ արժանացել են ջերմ ընդունելության քաղաքացիների կողմից։

Պատգամավորը տեղեկացրեց նաև, որ օրվա ընթացքում 63 քաղաքացի բերման է ենթարկվել, այդ թվում՝ անչափահասներ։

«Ոստիկանական համակարգը նորից ապօրինի գործողությամբ է զբաղվում ՝ անչափահասների է բերման ենթարկում։ Զգուշացնում ենք՝ բիրտ, կոշտ մեթոդները որքան շատ կիրառեք, այդքան ավելի շատ մարդ է մասնակցելու անհնազանդության ակցիաներին։ Ոչ ոք ձեզանից չի՛ վախենում,  ոչ ոք նահանջելու  տեղ չունի։ Մեր մտքի ծայրով էլ չենք անցկացնում, որ կարող է այս ակցիաները դադարել, պետք է ձեր ապօրինի գործողությունները դադարեն։ Դուք պետք է հասկանաք, որ մենք ընդամենն ուզում ենք Պատիվ ու Հայրենիք, դրա համար նահանջի տեղ չունենք»,- ասաց Դանիելյանը։

Նա հայտնեց, որ բերման ենթարկված բոլոր քաղաքացիներն ազատության մեջ են։

«Հրաշալի փաստաբանական խումբ ունենք, որոնք տեղում աջակցում են։ Որ ուսանողի հետ խնդիրներ կառաջացնեն բուհերում, մեր փաստաբանները պատրաստ են աջակցելու»,- նշեց քաղաքական գործիչը։