Ձեր վստահելի աղբյուրը

«Սպառնալիքի, ռազմական որևէ միջամտության ազդեցության տակ ցանկացած  պայմանավորվածություն արդեն իրավական ուժ չունի։ Իրենք են դա պնդում»,-  Panօrama.am-ի հետ զրույցում ասաց իրավագիտության դոկտոր, պրոֆեսոր Գևորգ Դանիելյանը։

Նա նշեց, որ շատ վատ է, որ մենք չենք օգտագործում Սահմանադրության անվտանգության բարձիկները. «Ժամանակին, երբ մենք Սահմանադրությունը  մշակում էինք, նաև դա ենք չէ՞ նկատի ունեցել, որ մարդը  միանձնյա չի կարող որոշումներ կայացել՝ ով էլ ուզում է լինել։ Ինչո՞ւ։ Որովհետև ներքին, արտաքին ազդեցությունները, սպառնալիքները, շանտաժը՝ ամեն ինչ էլ հնարավոր է։ Կարող է այնպիսի իրավիճակ ստեղծվել, որ մարդ ուղղակի չկարողանա դիմակայել։

Կան մի քանի անվտանգության բարձիկներ։ Օրինակ, հանրաքվե, եթե տարածքային  փոփոխություն է։ Եթե անգամ սա չեք համարում տարածքային փոփոխություն, պետք է դիտարկել որպես միջազգային պայմանագիր։ Անունը ինչ ուզում եք դրել՝  հայտարարություն, արձանագրություն, բոլորն էլ միջազգային պայմանագրեր են։ Եթե ձեռք է բերվել պայմանավորվածություն, այդ պայմանագիրը պետք է գար Ազգային ժողով, վավերացվեր։ Այլ ճանապարհ չկար։ Ոչ թե սահմանագծումը, սահմանազատումն ավարտվեն, արդյունքները բերվեն ու հաստատվեն Ազգային ժողովում, հակառակը պետք է լիներ»։

Գևորգ Դանիելյանը համոզված է, որ եթե իշխանությունները իսկապես փորձեին սահմանադրաիրավական ճանապարհով, ազգային շահերով  ղեկավարվել, իրենք կօգտագործեին այս ամեն ինչը։

«Երբ իրենց հուշում են, ասում են՝ չէ՞ որ կարող եք օգտագործել հանրության տրամադրությունները, մարդիկ համաձայն չեն, ժողովուրդն է չէ՞, ըստ իրենց, իշխանությունն իրականացում։ Կարող են ասել՝ ժողովուրդը համաձայն չէ, մեզ ժամանակ տվեք,  աշխատենք։ Ասում են՝ ոչ,  մենք չենք ուզում գցել ժողովրդի վրա, մենք ինքնուրույն  որոշում ենք կայացնում։ Չունեք այդ իրավասությունը։ Ախր ինքնուրույն որոշում կայացնելը համարձակության կամ ...  ընդհակառակն ապօրինություն է»։

Գևորգ Դանիելյանը Հայ Առաքելական եկեղեցու Գերագույն հոգևոր խորհրդի անդամ է։ Հարցին՝ երբևէ մտածե՞լ է, որ հենց հոգևորականը կառաջնորդի միակողմանի զիջումների դեմ պայքարը, պատասխանեց.  «Գիտեք, սա լավ օրից չէ։ Իհարկե, ես կկամենայի, կգերադասեի, որ դա տեղի չունենար,  բայց երբ արդեն հասել ենք այնպիսի մի սահմանագծի, որ այլևս տեսնում ենք այլ հնարավորություն, ճանապարհ չկա, պետք է հասկանալ, որ սա նույնիսկ ողջունելի է»։

Իրավագիտության դոկտոր, պրոֆեսոր Գևորգ Դանիելյանի հետ հարցազրույցն ամբողջությամբ՝ տեսանյութում։