Ձեր վստահելի աղբյուրը

«Մուսավաթ» ընդդիմադիր կուսակցության անհետացած ակտիվիստ Նաթիգ Մեհդին սպանել է գործընկերը, կասկածյալը կալանավորվել է։ Kavkaz-uzel.eu-ի փոխանցմամբ, այդ մասին հայտնում է Ադրբեջանի ՆԳՆ-ն։

Kavkaz-uzel.eu-ն հայտնել էր, որ մայիսի 10-ին Բաքվի Սաբայիլի շրջանից անհետացել է ընդդիմադիր «Մուսավաթ» կուսակցության ակտիվիստ Նաթիգ Մեհդին։

Նաթիգ Մեհդիի (Ուլուբեկ) ընտանիքի անդամների հայտարարության կապակցությամբ ոստիկանությունը սկսել է որոնողական աշխատանքներ՝ հետաքննության ընթացքում պարզվել է, որ նա սպանվել է։

Գերատեսչությունը նշել է, որ Մեհդին (Ուլուբեկ) սպանվել է Բաքվում «իր աշխատանքային գործընկերոջ» կողմից։ Գերատեսչությունում ընդգծել են, որ ձերբակալվել է Իսլամով անունով կասկածյալը։ Ներքին գործերի նախարարությունը չի բացահայտել հանցագործության հանգամանքներն ու դրդապատճառները՝ պատճառաբանելով մանրամասն տեղեկատվության բացակայությունը։

«Մուսավաթ» կուսակցության մամուլի ծառայության ղեկավար Մուստաֆա Հաջիբեյլին Kavkaz-uzel.eu-ի թղթակցին հայտնել է, որ Մեհդին (Ուլուբեկ) Բաքվի դպրոցներից մեկում անվտանգության աշխատակից է աշխատել։ Նրա խոսքով՝ ակտիվիստի մահվան մասին իրենք իմացել է լրագրողներից։