Ձեր վստահելի աղբյուրը

«Ցանկացած պարագայում, երբ հասարակական-քաղաքական մթնոլորտը սրվում է, այս նույն իրադարձությունները, նույն հռետորաբանությունը կրկնվում է։ Դա մտահոգիչ է»,- «Ատելության կոչեր, բռնություններ լրագրողների ու քաղաքացիների նկատմամբ՝ քաղաքական լարվածությանը զուգահեռ» թեմայով քննարկմանն ասաց Խոսքի ազատության պաշտպանության կոմիտեի նախագահ Աշոտ Մելիքյանը։

Նա նշեց, որ այդ հռետորաբանությունն է սրում իրավիճակը, խորացնում անհանդուրժողականությունը տարբեր ճակատների միջև։

«Իրավիճակը թեժացնելով՝  կարելի է ուղղակի իրավիճակը հասցնել քաղաքացիական լուրջ ընդհարումների։ Այդ վտանգը կա։

Ատելության խոսքն ինչո՞վ է վտանգավոր, որ գալիս է ինչ-որ պահ, երբ խոսքից անցնում են գործի, գործադրվում են ուժային մեթոդներ առճակատման մեջ մտած ճամբարների միջև, ինչը կատաստրոֆիկ հետևանքների կարող է հասցնել»,- ասաց Մելիքյանը։

Ազատության պաշտպանության կոմիտեի նախագահը «Տավուշը հանուն հայրնեիքի» շարժման առաջնորդ Բագրատ արքեսպիսկոսպոս Գալաստյանանի ելույթների, հայտարարությունների մասին ասաց. «Կարծես ինքն իրեն չի կառավարում, չի պատկերացնում, որ սեր բառն օգտագործելուց հետո ինչ-որ մեկին պիտակավորում է, դա փաստորեն չեզոքացնում է  սերը, հանդուրժողականությունը։

Կարելի է հասկանալ, Բագրատ արքեպիսկոպոսը քաղաքական փորձ չունի, սովոր է եկեղեցում, իր քարոզի ժամանակ մարդիկ գլուխները կախ լսում են իրեն, մինչդեռ քաղաքականությունն այլ ոլորտ է, եթե մտել ես քաղաքականություն, պետք է պատրաստ լինես, որ քեզ կհակադարձեն, խիստ կքննադատեն, շատ բաներ չեն ընդունի։ Կարծում եմ, որ իր հռետորաբանության մեջ նույնպես անընդունելի արտահայատությունների, գործողությունների, վարվելակերպի բավականին մեծ չափաբաժին կա»։

Քննարկմանը ներկա «Հելսինկյան ասոցիացիա» իրավապաշտպան ՀԿ-ի փաստաբան Արա Ղարագյոզյանի խոսքով, եթե հանդուրժողականությունը չլինի, կարող են ծանր հետևանքների առաջ կանգնել։

«Հանդուրժողական մթնոլորտը պետք է բոլոր կողմերից լինի՝ իշխանության, ընդդիմության։
Եթե անդրադառնանք ոստիկանությանը, քաղաքացիներին, ինձ համար մտահոգիչ է, մենք տեսնում ենք, թե հավաքի մասնակիցների, թե ոստիկանության բառամթերը, ինչպես են մեկը մյուսին վիրավորում, ինչը մտահոգիչ է»,- ասաց նա։

Ա.Մելիքյանը կարծում է, որ եթե իշխանությունները վկայակոչում են ոտիկանությունում իրականացված բարեփոխումները, ապա դրանք պետք է արտացոլվեն գործողությունների մեջ, մինչդեռ ոստիկանության վերջին շաբաթների գործողություններում որևէ լուրջ փոփոխություն, տարբերություն, նախորդ տասնամյակների համեմատ,  չի տեսնում։

«Այդ բարեփոխումները առաջին հերթին պետք է դրսևորվեն հենց էքստրեմալ պայմաններում, մինչդեռ տեսնում ենք անհամաչափ ուժի կիրառում ցուցարարների նկատմամբ, ոչ պրոֆեսիոնալ աշխատանք լրագրողների հետ։

Իրադարձությունների սկզբից մինչև այսօր արդեն 10 ֆիզիկական բռնության դեպք ենք արձանագրել ընդդեմ լրագրողների, որոնցից ութը ոստիկանների կողմից է իրականացվել։
ՆԳՆ-ն պետք է լուրջ քայլեր ձեռնարկի, անձնակազմի հետ աշխատանք կատարի, հակառակ դեպքում  միջազգային կազմակերպությունների մյուս տարվա զեկույցներում կարելի է արձանագրել, որ Հայաստանը հետընթաց է ունենալու խոսքի ազատության առումով»,- ասաց նա։ 

Նա նշեց, որ շատ կարևոր՝ անկախ նրանից տուժել է պրոիշխանական լրատվամիջոցի լրագրող, թե ընդդիմադիր ուժերին հարող լրատվամիջոցների թղթակիցներ,  իրավապահ մարմինները պետք է հավասար մոտեցում ցուցաբերեն պատասխանատվություն կիրառելիս. «Այնպես չստացվի, որ պրոիշխանական լրատվամիջոցի թղթակիցը երբ հարված է  ստանում, այդ դեպքում հարվածողը միանգամից կալանավորվում է, օպերատիվ քրեական գործ է  հարուցվում, եթե ընդդիմադիր ուժերին հարող լրատվամիջոցի ներկայացուցիչ է տուժում, կարող են գործը քննացնել, բավականաչափ ուշադրությամբ չքննեն։ Այդպիսի միտում մենք առայժմ նկատում ենք։ Հետևելու ենք զարգացումներին, մտադիր ենք փաստերով այդ մասին հանրությանը տեղեկացնել»։ 

Արա Ղարագյոզյանը նշեց, որ թեև 6 տարի ու դրանից առաջ էլ, խոսվում է ոստիկանական համակարգում բարեփոխումների մասին, բայց չեն տեսնում բարեփոխված ոստիկանություն. «Տեսնում ենք, որ քաղաքացիներին բերման են ենթարկում մայթերից, քաղաքացիների նկատմամբ ոչ համաչափ ուժ, ոստիկան-լրագրող լեզվակռիվ։

Շատ դեպքում ոստիկան-քաղաքացի լեզվակռվի դեպքում հնարավոր է քաղաքացին վիրավորական արտահայտություններ  հնչեցնի ոստիկանի հասցնեին։ Կարող է քաղաքացին իրավագիտակից չէ, բայց ցավալին այն է, որ առհասարակ կարմիրբերետավորները սկսում են  լեզվակռիվ մեջ մտել քաղաքացիների հետ։

Առավել ևս անթույլատրելի է, թե ինչպես են փաստաբանների բերման ենթարկում»,- ասաց փաստաբանը։

Նա նշեց, որ մտահոգիչ է, որ խաղաղ հավաքների ժամանակ ոստիկանները հատուկ առարկաներով, հատուկ սրվակներով՝ «գազվի բալոնչիկներով» է զինված լինում։