Ձեր վստահելի աղբյուրը

Տավուշի մարզպետ Հայկ Ղալումյանն այսօր գնացել է Կիրանց և փակ հանդիպում ունեցել բնակիչների հետ, որոնք երեկվանից փակել էին միջպետական ճանապարհը՝ իրենց դժգոհությունը հայտնելով մայիսի 15-ին ԱԳՆ հաղորդագրությունից ու կառավարության պարզաբանումից սահմանազատման գործընթացի վերաբերյալ։

Panorama.am-ի հետ զրույցում «Հայաստան» խմբակցության պատգամավոր Գառնիկ Դանիելյանը, ով երեկ գնացել էր Կիրանց, ասաց, որ հանդիպումն ավարտվել է, մարդիկ որևէ դրական պատասխան չեն ստացել։

«Մարդիկ դժգոհ են, մարդկանց նույնն բանն են ասել՝ գյուղը դպրոցի մոտով կիսվում է երկու մասի, տներ են մնում ադրբեջաական կողմին։ Ասել է փոխհատուցում կլինի, մարդիկ նեղված, հուզված, վրդովված են»,- մանրամասներ ներկայացրեց Դանիելյանը։

Այս պահին միջպետական ճանապարհը բաց է։ Բայց մարդիկ հավաքված են ճանապարհի մոտ ու ամեն վայրկյան, Գ.Դանիելյանի խոսքով, կարող է  կրկին փակվել։

«Հիմա ժողովուրդը հավաքված է, խոսում են, քննարկում»,- ասաց նա։

Հիշեցնենք՝ մայիսի 15-ին  բավականին ուշ ժամի ԱԳՆ-ն հայտարարել էր, որ կայացել է Հայաստանի և Ադրբեջանի միջև պետական սահմանի սահմանազատման հարցերով պետական հանձնաժողովների իններորդ հանդիպումը, որի ընթացքում  Հայաստանի Բաղանիս, Ադրբեջանի Բաղանիս-Այրում, Հայաստանի Ոսկեպար, Ադրբեջանի Աշաղը Ասկիպարա, Հայաստանի Կիրանց, Ադրբեջանի Խեյրեմլի, Հայաստանի Բերքաբեր, Ադրբեջանի Կըզըլ Հաջիլի գյուղերի հատվածներում սահմանի նկարագրություն-արձանագրությունները համաձայնեցվել են ԽՍՀՄ Զինված ուժերի Գլխավոր շտաբի 1976 թվականի իրավական հիմք ունեցող տոպոգրաֆիական քարտեզների հիման վրա, ստորագրվել է արձանագրություն։ Նաև հայտնել են կառավարությունից, որ «Կիրանցի համար նպաստավոր լուրը մասնավորապես այն է, որ մոտ 25 հեկտար գյուղատնտեսական նշանակության հողեր, որոնք վերջին 33 տարում անհասանելի են եղել Կիրանցի համար, կվերադարձվեն գյուղին։ Սահմանի նկարագրությունն այնպիսին է, ինչպիսին կա 1976 թվականի քարտեզով: Ինչպես ասվել է, ճանապարհի տեղափոխման խնդիր, այո, առաջանալու է, որը հնարավոր է իրականացնել 2-3 ամսում: Կհիմնանորոգվի նաև  Հ-26 ավտոճանապարհից դեպի Աճարկուտ, ապա Կիրանց տանող ճանապարհը, որն այլընտրանքային է Կիրանցի համար: Ինչ վերաբերում է գույքային հարցերին, դրանց ծավալը մեծ չի լինի, և կառավարությունը բոլոր նման դեպքերում կփոխհատուցի քաղաքացիների կրած վնասները, ըստ նրանց նախընտրության գույքային կամ ֆինանսական եղանակով: Կառավարության ներկայացուցիչները առավոտից արդեն կգույքագրեն հնարավոր խնդիրները և կսկսեն քննարկումները Կիրանցի բնակիչների հետ»։