Ձեր վստահելի աղբյուրը

«Ես եկել եմ Արարատից, 45 կմ հեռավորությունից։ Ինչպես ասում է վրաց բանաստեղծ Նոդար Դումբաձեն՝«Իմ հոգին ավելի ծանր է, քան մարմինս», իմ հոգին է ինձ թելադրել, որպեսզի ես գամ այստեղ, երկրորդ անգամ եմ գալիս Սրբազանին լսելու»,- ԵՊՀ-ի դիմաց Բագրատ Սրբազանի անցկացրած դասախոսության ժամանակ Panorama.am-ին ասաց նախկին դասախոս Գառնիկ Մարգարյանը։

Նա հույս հայտնեց, որ լսարաններում  դասախոսներն  այնպիսի որակով դասախոսություն կանցկացնեն, ինչպես Բագրատ Սրբազանն է անցկացնում։

«Ես ոգեկոչում եմ մեր ժողովրդին, որ ինչքան շուտ նեռը վերանա մեր միջավայրից, այնքան շուտ մենք կապրենք ազատ միջավայրում»,-ասաց Գառնիկ Մարգարյանը և շարունակեց. «Սա ապակուսակցական շարժում է և վերջին 30 տարիներին որևէ առաջնորդի չի հաջողվել մեկ տեղում համախմբել հասարակության տարբեր շերտերին»։

Դասախոսը նշեց, որ միշտ հիացմունքով է լսում Սրբազանի խոսքը։

«Շատ ուրախ եմ, որ մեր մեջ ծնվել է այսպիսի առաջնորդ, որը կկարողանա հասարակության միջից  հանել աղբը, որպեսզի շուտ կարողանանք ապաքինվել ստախոս աշխարհից»,-ասաց Մարգարյանը։

Նա անդրադարձավ նաև ԱԺ ՔՊ պատգամավորների այն խոսքերին, թե գումարի դիմաց են մարդկանց բերում Բագրատ սրբազանի հանրահավաքներին։

«Ուղղակի ծիծաղում եմ, որ ազգային ժողովում մարդիկ են նստում և ասում են, թե այստեղ մարդկանց կաշառքով են բերում, ինչպես կարելի է ԱԺ -ում նստել, պատգամավորի կոչում ունենալ և այդպիսի ստախոսությամբ զբաղվել»- ասաց նախկին դասախոսը։