Ձեր վստահելի աղբյուրը

«Մեր բոլոր մտավախությունները, մտահոգություններն այս իշխանություններն իրականացնում են Ադրբեջանի հետ ձեռք ձեռքի տված, անշեղորեն, րոպե առ րոպե»,- Սուրբ Աննա եկեղեցու բակում «Տավուշը հանուն հայրենիքի» շարժման հավաքին հայտարարեց շարժման անդամ, պատգամավոր Գառնիկ Դանիելյանը։

Նա նշեց, որ այսօր տարածքային կառավարման և ենթակառուցվածքների նախարար Գնել Սանոսյանը գնացել էր Կիրանց ու ապազգային կառավարության վերջնագիրն էր ներկայացնում կիրանցիներին, ասելու՝ գյուղը բաժանվում է երկու մասին, դպրոցի մոտից գյուղը կիսվում է։

«Գյուղացիներին տարբեր մեթոդներով՝ մեկին մտերմիկ խոսակցության կանչելով, մյուսին գումար առաջարկելով, փորձում են մարդկանց համոզել հրաժարվել իրենց շիրիմներից, տներից, պապական օջախներից։  Իրենք մինչև հիմա այդպես են իշխանության. 6 տարվա մեջ իրենց փող են տվել, իրենք էլ հայրենիք են տվել։ Իրենց գործելաոճն է, մտածում են, արժանապատիվ քաղաքացիներն էլ իրենց նման ծախու են։

Բայց ի պատիվ կիրանցիների, մարդիկ հաշտ չեն իրողությունների հետ։

Մեր հայրենակցիների մեծ մասին սահմանապահ համայքներում որևէ բան չի հետաքրքրում, բացի պատվից ու հայրենիքից, արժանապատվությունից, շիրիմներից։

Կիրանցիներից մի քանիսից լսեցի, որ եթե ուզում են գումար տալ, կաշառել, թող գան մեր զոհվածների պանթեոն, մենք այնտեղ կասենք, թե ինչի համար է պայքարը, այս սրբազան պայքարը»,- ասաց Գ. Դանիելյանը, ով վերջին երկու օրերին Կիրանցում է եղել։

Նա հայտնեց, որ արդեն այսօրվանից սահմանապահ զորախումբ է բերվել Կիրանց, պատրաստվում են մոտ օրերս առաջնագիծը նվիրաբերել թշնամուն։