Ձեր վստահելի աղբյուրը

«Կառավարության նիստում հաստատվեց բնակարանային աջակցության պետական ծրագիրը, որը հնարավորություն կտար Արցախից բռնի տեղահանված շուրջ 25 հազար ընտանիքների պետության աջակցությամբ ձեռք բերել անշարժ գույք կամ կառուցել բնակելի տուն»,-«Արմենպրես»-ի մամուլի սրահում  հայտնեց Աշխատանքի և սոցիալական հարցերի նախարարության կառուցվածքային ստորաբաժանումների առանձին գործառույթներ համակարգող խորհրդական Գայանե Ղարագյոզյանը։ 

Նա հայտնեց, որ բնակարանային հասանելիության ապահովման պետական աջակցություն կտրամադրվի ԼՂ-ից բռնի տեղահանվածները։

Ղարագյոզյանը հայտնեց, որ ծրագիրն իրականացվելու է 3 ուղղություններով, որից առաջինը բնակարանի կամ  կառուցվող շենքի բնակարանի, կամ անհատական բնակելի տան  ձեռքբերումն է, որի համար տրամադրվելու է ձեռքբերման հավաստագիր։

Գայանե Ղարագյոզյանը նշեց, որ երկրորդ ուղղությունն անհատական բնակելի տների կառուցապատումն է, որն իրականացվելու է Քաղաքաշինության պետական կոմիտեի կողմից նախապես պատրաստված և հրապարակված  օրինակելի նախագծանախահաշվարկային փաստաթղթերի հիման վրա և իրանանացվելու է լիցենզավորված ընկերությունների կողմից, իսկ երրորդ ուղղությունը գործող հիփոթեքային վարկի մարման աջակցությունն է։

«Եթե ընտանիքը 2023 թվականի սեպտեմբերի 19-ի կամ  ծրագրին դիմելու օրվա դրությամբ  ունի ծրագրի պայմաններին բավարարող գործող հիփոթեքային վարկ, ապա աջակցույթունը կուղղվի այդ ուղղությամբ»,- հայտնեց բանախոսը։

Նրա խոսքով՝ կառավարության որոշմամաբ հաստատվել է հավելված, որոնցից մեկում կա 242 բնակավայր, որտեղ տուն ձեռք բերելու կամ կառուցելու համար ընտանիքի յուրաքանչյուր անդամի հատկացվում է 5 մլն դրամ։
«Կա մեկ այլ ցանկ, որտեղ 148 բնակավայրեր են, որտեղ արդեն յուրաքանչյուր ընտանիքի համար աջակցության չափը կկազմի 4 մլն դրամ։ Մնացած բոլոր բնակավայրերում, բացառությամբ Երևանի 1 և 2 գոտիների՝ աջակցության չափը կկազմի 3 մլն դրամ»,-ասաց Գայանե Ղարագյոզյանը։

Նա տեղեկացրեց, որ գործող հիփոթեքի մասով  յուրաքանչյուր անդամի աջակցության չափը կկազմի  2 մլն դրամ։

Անդրադառնալով ծրագրի սահմանափակումներին՝ նախարարության խորհրդականը նշեց, որ ծրագրից չեն կարող օգտվել այն ընտանիքները, որոնց մեկ անդամը ունի 18 ք/մ-ն գերազանցող անշարժ գույքի 50 %-ի չափով սեփականության իրավունք։

Աջակցություն ստանալու համար պարտադիր պայման է նաև, որ ծրագրին դիմելու օրվա դրությամբ ընտանիքի բոլոր անդամներն ունենան ՀՀ քաղաքացիություն։