Ձեր վստահելի աղբյուրը

4 տարի տևած քննության արդյունքում Արարատի և Վայոց ձորի մարզերի ընդհանուր իրավասության դատարանի Նախագահ, դատավոր՝ Հարություն Պետրոսյանի դատավճռով ՀՀ ոստիկանության Արտաշատի բաժնի նախկին պետ՝ Արթուր Հարությունյանը, ով մեղադրվում էր՝ ՀՀ քրեական օրենսգրքի 308-րդ հոդվածով սահմանված հանցանքի կատարման մեջ (պաշտոնեական լիազորությունները չարաշահել) արդարացվեց։ Այս մասին տեղեկացնում է փաստաբան Էրիկ Ալեքսանյանը։

Հիշեցնենք, որ ՀՔԾ-ն 2020 թ. հունիսի 5-ին տարածել էր հաղորդագրություն, ըստ որի, տարբեր տարիներին ՀՀ ոստիկանության Արտաշատի բաժնի պետի պաշտոնը զբաղեցրած Ա. Հովհաննիսյանն ու Ա. Հարությունյանը, անձնական շահագրգռվածությունից ելնելով, պաշտոնեական դիրքն օգտագործել են ծառայության շահերին հակառակ և կատարել պաշտոնեական կեղծիք։

Ըստ մեղադրանքների` Ա. Հարությունյանը 2016թ.-ին, իսկ Ա. Հովհաննիսյանը` 2016-2019թթ-ին զբաղեցնելով ոստիկանության Արարատի մարզային վարչության Արտաշատի բաժնի պետի պաշտոնը, քաջատեղյակ են եղել, որ իրենց կողմից ղեկավարվող բաժնի ոստիկանը պաշտոնի նշանակման օրվանից չի ներկայացել ծառայության եւ փոխարենը կատարել է իր պարտականությունների մեջ չմտնող գործողություններ՝ որպես վարորդ սպասարկելով ՀՀ ոստիկանության կազմակերպված հանցավորության դեմ պայքարի գլխավոր վարչության պաշտոնատար անձին:

Ա. Հովհաննիսյանն ու Ա. Հարությունյանը, հիշյալ ոստիկանին օգնելու անձնական շահագրգռվածությունից ելնելով, պաշտոնեական դիրքն օգտագործել են ծառայության շահերին հակառակ, չեն արձանագրել եւ ընթացք չեն տվել վերջինիս կողմից անհարգելի պատճառներով ծառայության չներկայանալու դեպքերին, ապա` իրենց ստորագրությամբ հաստատել են ոստիկանության Արտաշատի բաժնի ծառայողների աշխատավարձերի ցուցակները, որոնցում ներառված են եղել նաեւ անհարգելի պատճառներով ծառայության չներկայացած եւ ծառայողական պարտականությունները չկատարած ոստիկանի վերաբերյալ կեղծ տվյալներ:

Դրանց հիման վրա իրականացվել է ՀՀ ոստիկանության Արտաշատի բաժնի ծառայողների ամսական ֆինանսավորումը, որի հետեւանքով պետությանը պատճառվել է շուրջ 4 մլն ՀՀ դրամի գույքային վնաս, որը նախաքննության ընթացքում ամբողջությամբ վերականգնվել է: