Ձեր վստահելի աղբյուրը

«Հիդրոօդերևութաբանության և մոնիթորինգի կենտրոն» ՊՈԱԿ-ը կանխատեսել է՝ Միջերկրական ծովի շրջաններից ակտիվ ցիկլոնի ներթափանցմամբ պայմանավորված՝ մայիսի 24-26-ին Երևանում հնարավոր են ինտենսիվ անձրևներ և կարկուտ։

Վերջին մեկ ամսվա ընթացքում հորդառատ անձրևների հետևանքով Երևանի փողոցներում իսկական գետեր էին առաջանում, մեքենաները, ավտոբուսները հայտնվում դրանց մեջ։

Ի՞նչ է անում Երևանի քաղաքապետարանը այս անգամ էլ քաղաքը նույն վիճակում չհայտնվելու համար, արդյո՞ք ջրահեռացման համակարգերը մաքրվել են այս օրերի ընթացքում։

Երևանի քաղաքապետի մամուլի քարտուղար Հայկ Կոստանյանը Panorama.am-ին ասաց, որ  դա ամբողջությամբ «Վեոլիա Ջուր» ընկերության պարտականությունն է։

«Մի քանի օր առաջ Երևանի փոխքաղաքապետ Լևոն Հովհաննիսյանը հանդիպել է «Վեոլիա Ջուր» ընկերության շահագործման տնօրենի հետ, հորդորվել է՝ խստորեն պահպանել կանոնները, հեղեղատար  համակարգն ամբողջությամբ մաքրել, «Վեոլիա»-ն էլ աշխատանքներ կատարում է»,- ասաց նա։

Հ. Կոստանյանը  նշեց, որ փոխքաղաքապետը որոշ հատվածներում շրջայց է իրականացրել։

««Վեոլիա Ջուր» ընկերությունը, ըստ պայմանագրի, երկու անգամ են մաքրում հեղեղատար  համակարգը՝ գարնանը, աշնանը, բայց քանի որ հեղեղատար համակարգերի վիճակը վատ է, հորդորել ենք մաքրումները պարբերաբար անել։ Երբ մաքրումներն անում են, քաղաքապետարանի աղբահանության հիմնարկը դրան զուգահեռ աղբը հեռացնում է»,- ասաց Երևանի քաղաքապետի մամուլի խոսնակը։

Հարցին՝ առաջիկայում հորդառատ անձրևների դեպքում Երևանում չի՞ կրկնվի նախկին վիճակը, Հայկ Կոստանյանը պատասխանեց. «Չեմ կարող վստահորեն ասել՝ կկրկնվի, թե ոչ։ Ամեն դեպքում  «Վեոլիա Ջուր» ընկերության գործընկերներին ևս մեկ անգամ ասել ենք, որ իրենց աշխատանքը մաքսիմալ լավ անեն»։