Ձեր վստահելի աղբյուրը

«Առաջիկա երեք օրերին, ինչպես հայտարարել ենք, Հայաստանն ու ողջ Կովկասը գտնվելու են Միջերկրական ծովի շրջաններից  ներթափանցած բավականին ակտիվ ցիկլոնի  գոտում, որի գործունեության պիկը կլինի հիմնականում երեկոյան ժամերին»,-Panorama.am-ի հետ զրույցում հայտնեց  «Հիդրոօդերևութաբանության և մոնիթորինգի կենտրոնի» տնօրենի տեղակալ Գագիկ Սուրենյանը։

Նրա խոսքով, ցիկլոնի հետևանքով գրեթե ողջ հանրապետությունում ժամանակ առ ժամանակ կդիտվեն ամպրոպային բնույթի անձրևներ, առանձին հատվածներում դրանք կլինեն ինտենսիվ, հնարավոր է նաև կարկուտ։

«Տեղումներով ու ամպամածության ծածկով պայմանավորված նաև որոշակի ցուրտ օդի ներհոսք ունենք այսօր հյուսիս-արևելքից, ջերմաստիճանն առաջիկա երկու օրերին կնվազի 5-7 աստիճանով։ Այնուհետև ցիկլոնը մայիսի 27-ից սկսած դուրս է գալիս մեր հանրապետության տարածքից, բայց հետո ակտիվանում են ներզանգվածակին երևույթները։ Դա նշանակում է, որ օրվա առաջին կեսին գերակշռելու է առանց տեղումների եղանակը, կեսօրից հետո՝ դեպի երեկո կզարգանան ամպրոպային ամպեր, ինչի արդյունքում կրկին մայիսի 27-29 երեկոյան ժամերին կդիտվեն ամպրոպային բնույթի անձրևներ, մեծ է մնում կարկուտի ռիսկը»,-ասաց նա։

Սուրենյանի խոսքով, ամռան գալուստի մասին վաղ է ազդարարելը, դեռ չկան տաք օդային ներհոսք, ջերմաստիճանի բարձրացում։

«Ամառը դեռ չի էլ սկսել, մենք դեռ մայիսի մեջ ենք, մայիսը համարվում է մեր երկրի ամենախոնավ ամիսը։ Իհարկե, այս տարի չափից շատ էին տեղումները, առանձին հատվածներում տեղումները կազմել են նորմայի կրկնակին, չի բացառվում, որ մինչև ամսվա վերջ դառնա եռակի»,-նշեց կենտրոնի փոխտնօրենը։

Մանրամասները՝ տեսանյութում։