Ձեր վստահելի աղբյուրը

Ընդլայնման և հարևանության քաղաքականության հարցերով եվրահանձնակատար Օլիվեր Վարհելին հանդես է եկել հայտարարությամբ՝ բացատրելով, թե ինչ նկատի ուներ՝ Վրաստանի վարչապետ Իրակլի Կոբախիձեին հիշեցնելով Սլովակիայի կառավարության ղեկավար Ռոբերտ Ֆիցոյի դեմ մահափորձի մասին։ Այդ մասին հայտնում է «Սպուտնիկ գրուզիան»։

Հինգշաբթի օրը, Կոբախիձեն հայտնել էր, որ եվրահանձնակատարներից մեկն իրեն սպառնացել է հեռախոսազրույցի ժամանակ։ Վարչապետի խոսքով՝ եվրահանձնակատարը թվարկել է այն միջոցները, որոնք կարող են ձեռնարկել արևմտյան քաղաքական գործիչները, եթե Վրաստանի խորհրդարանը հաղթահարի «Օտարերկրյա ազդեցության թափանցիկության մասին» օրինագծի վետոն և ավելացրել էր. Դուք տեսել եք թե ինչ է եղել Ֆիկոյի հետ, զգույշ եղեք»։

«Վկայակոչելով Վրաստանի վարչապետի՝ 2024 թվականի մայիսի 23-ի հայտարարությանը, ես ցանկանում եմ իմ ամենաանկեղծ ափսոսանքը հայտնել, որ իմ հեռախոսազրույցի որոշ հատվածներ դուրս են բերվել համատեքստից»,-ասված է հայտարարության մեջ։

Նա ընդգծել է, որ օրինագծի ընդունումը կարող է հանգեցնել Թբիլիսիի փողոցներում անվերահսկելի գործընթացների։

«Լիովին տեղյակ լինելով վրացական հասարակության շատ ուժեղ եվրոպամետ տրամադրություններին, իմ հեռախոսազրույցի ընթացքում անհրաժեշտ եմ համարել վարչապետի ուշադրությունը հրավիրել այս օրենքի ընդունմամբ առանց այն էլ փխրուն իրավիճակը չսրելու կարևորության վրա, որը կարող է հանգեցնել հետագա բևեռացման և Թբիլիսիի փողոցներում հնարավոր անկառավարելի իրավիճակների»,-ասված է հաղորդագրությունում։

Նա ընդգծեց, որ Ֆիցոյի դեմ մահափորձի մասին հիշատակումը կապված է հենց դրա հետ։

«Այս առումով Սլովակիայում տեղի ունեցած վերջին ողբերգական իրադարձությունը բերվեց որպես օրինակ և ցուցում, թե ինչի կարող է հանգեցնել հասարակության բևեռացման նման բարձր մակարդակը, նույնիսկ Եվրոպայում»,-ասվում է եվրահանձնակատարի հայտարարության մեջ:

Սլովակիայի վարչապետի դեմ մահափորձը, որը բազմիցս հանդես է եկել Ուկրաինային զենք մատակարարելու և ՆԱՏՕ-ին նրա անդամակցության դեմ, տեղի է ունեցել մայիսի 15-ին Գանդլովա քաղաքում կառավարության նահանջից հետո: Ֆիցոն մի քանի հրազենային վիրավորում է ստացել։