Ձեր վստահելի աղբյուրը

«Այն, որ աշխարհի ուշադրությունը կենտրոնացած է Բաքվում կայանալիք COP 29 համաժողովի վրա, մեծ հնարավորություն  է տալիս Ադրբեջանի և Հայաստանի միջև խաղաղության համաձայնագրի ստորագրման համար»,-ադրբեջանական ԶԼՄ-ների փոխանցմամբ, այս մասին NE Global-ին տված հարցազրույցում ասել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։

Նա մանրամասնել է՝ վերջերս Հայաստանի և Ադրբեջանի միջև պայմանավորվածություն է ձեռք բերվել որոշ կալանավորների փոխադարձ ազատ արձակման, ինչպես նաև միմյանց դիվանագիտական աջակցության փոխանակման վերաբերյալ։

Ադրբեջանցի պաշտոնյան ասել է՝ Հայաստանը հանել է իր վետոն COP29-ն ընդունելու Ադրբեջանի հայտի վրայից, իսկ դրա դիմաց Բաքուն համաձայնել է Հայաստանին ընդգրկել կլիմայի գլոբալ համաժողովի գործադիր կոմիտեում։

«Իհարկե, սա մեծ բեկում էր, քանի որ առաջին անգամ ուղղակի շփումների միջոցով կարողացանք հասնել վստահության ամրապնդման այս միջոցառմանը, և դա նաև ցույց տվեց, որ երկու երկրներն ի վիճակի են լուծել իրենց տարաձայնությունները ուղիղ երկկողմ շփումների միջոցով՝ առանց ցանկացած երրորդ կողմի մասնակցության»,- ասել է նա:

Ամիրբեկովը նշել է, որ Բաքվի և Երևանի միջև խաղաղ համաձայնագրի շուրջ աշխատանքները շարունակվում են։

«Մենք զգուշավոր լավատեսություն ենք ցուցաբերում և կարծում ենք, որ հնարավոր է խաղաղության պայմանագրի տեքստի շուրջ բանակցություններն ավարտվեն մինչև COP29-ը։ Սա հզոր ազդակ կլինի արտաքին ախշարհին, որ եվրոպական մայրցամաքի՝ հետխորհրդային տարածքում ամենահին, ամենաերկար և ողբերգական հակամարտություններից մեկը ավարտին է մոտենում։ Ուստի կարծում եմ, որ Հայաստանի ու Ադրբեջանի ժողովուրդները պետք է պատրաստ լինեն նման դրական արդյունքի»,-ասել է նա։

Հիշեցնենք, որ COP 29-ը կանցկացվի Բաքվում նոյեմբերի 11-22-ը։