Ձեր վստահելի աղբյուրը

Երևան քաղաքի առաջին ատյանի ընդհանուր իրավասության քրեական դատարանի («Աջափնյակ-1» նստավայր),  դատավոր Մարտին Արզումանյան, որոշմամբ  Ստեփանակերտի քաղաքապետ Դավիթ Սարգսյանը 20 օրով կալանավորվել է։ 

Փաստաբան Ռոման Երիցյանը հայտնում է, որ դատարանը մասնակից է բավարարել քննիչի միջնորդությունը, որը պահանջել էր 2 ամսով կալանավորել Դ.Սարգսյանին։ 

«Դավիթ Սարգսյանը կալանավորվեց 20 օրով, սահմանափակվել է նաև նրա տեսակցելու իրավունքը։ Բոլորիս համար ավելի քան ակնհայտ է, թե ինչու 20 օրով և ինչու կալանավորում, որպեսզի սահմանափակվի նրա ակտիվ գործունեությունը, վերջինս իր հանրային հեղինակությունն ու քաղաքացիների նկատմամբ վստահությունը չօգտագործի այս իրադարաձություններում։ Այսինքն, այս 20 օրը նշանակված է նրա համար, որպեսզի տեսնեն, թե սկսված պայքարը ինչ հանգուցալուծում է ունենում»,- նշում է փաստաբանը։ 

Ավելի վաղ փաստաբանը գրել է. «Դավիթ Սարգսյանը մեղադրվում է արցախցի լինելու, Բագրատ Սրբազանին հանդիպելու, Նիկոլ Փաշինյանին չաջակցելու և Ստեփանակերտի քաղաքապետարանի տրանսպորտային միջոցները թուրքերին չթողնելու «հանցավոր»արարքների կատարման մեջ»։