Ձեր վստահելի աղբյուրը

«Այսօր այստեղ պետք է լիներ Հայաստանի կառավարության ղեկավարը։ Բայց ինչո՞ւ այստեղ չէ։ Որովհետև վաղուց արդեն նա դադադել է  լինել մեր ժողովորի իղձերն ու երազանքները  ներկայացնողը, բարոյական ու հոգևոր խորը արժեքը կրողն ու փոխանցողը, որը միայն և միայն ուղղված է մեր ժողովրդի վերելքին»,- Սարդարապատի հուշահամալիրում Հայաստանի Առաջին Հանրապետության տոնի առիթով ունեցած իր ելույթում  ասաց «Տավուշը հանուն հայրենիքի» շարժման առաջնորդ  Բագրատ արքեպիսկոպոս Գալստանյանը։

Բագրատ Սրբազանն իր խոսքում նաև նշեց. «Այդ մարդը հատել է բոլոր սահմանագծերը՝ և իրավական, և մարդկային, և բարոյական։ Եվ այս օրը նրա այստեղ չգտնվելը դրա վկայությունն է։

Ես չգիտեմ՝ դա սեփական որոշում է, թե թելադրված որևէ տեղից, բայց փաստն այն է, որ այսօր այստեղ մենք ենք և այսօր դուք հերթական անգամ արձանագրում եք այն հաղթանակը, որ Սրբազան պայքարի բովով անցնում ենք։

Մենք միասին համբերությամբ, նպատակային ընթանալով ենք այս սրբազան պայքարի, որը ծնվել է «Տավուշը հանուն հայրենիքի» շարժման ընթացքում, օրակարգով ու բովադակությամբ՝ հասնելով ճշմարտության հաղթանակին, որն արդեն գոյություն ունի ձեր սրտերի, մտքերի մեջ։ 

Ճշմարտության հաղթանակը պետք է դառնա անխուսափելի, որի կրողները դուք եք, սիրելի ժողովուրդ։ 

Սիրելի ժողովուրդ, իրական Հայաստանը, որ դուք եք, պետք է հաղթի ֆեյսբուքյան Հայաստանին։

Հոգևոր Հայաստանն իր անսահման սահմաններով պետք է հաղթի «նոր Հայաստանին», որը սահմանափակ է»։