Ձեր վստահելի աղբյուրը

«Շողակաթ» հեռուստաալիքը տեսանյութ է հրապարակել, թե ինչպես այսօր Հայոց Հայրապետն ու եկեղեցականներն այցելեցին Սարդարապատի հուշահամալիր՝ հաղթահարելով ոստիկանական պատնեշները։

Մայր Աթոռ Սուրբ Էջմիածնի միաբան Ասողիկ աբեղա Կարապետյանը գրում է.

«Պետական արարողակարգի խաբեությունն ու նենգ սադրանքը:

Այս տեսանյութը պետք է ներկայացներ Հայոց Հայրապետի և հոգևոր դասի աղոթքը և օրինակելի խոնարհումը Սարդարապատի սուրբ կոթողի և ազգապահ խորհրդի առջև:

Սակայն պետական նենգ խաղի պատճառով այս տեսանյութը ներկայացնում է պետության որոշ պաշտոնյաների և ուժայինների անպատկառությունն ու խայտառակությունը:

Եվ այսքանից հետո գտնվում են անձեր, ուժեր, որոնք վայրահաչում են. ձեր ստոր քայլերով ու խաղերով երբեք, ոչ մի դեպքում Ազգային Եկեղեցուն չեք ներքաշի քաղաքական խաղերի մեջ, չեք օգտագործի Սբ Եկեղեցու և Մայր Աթոռ Սուրբ Էջմիածնի բարձրագույն հեղինակությունը՝ ընդդեմ Պետության և Պետականության նվիրական գաղափարների:

Համարձակվեցիք ճանապարհ փակել, սակայն գլխահակ ու ծնկած ճանապարհ բացեցիք. ամոթ, նախատինք ձեզ ամենքիդ»։ 

Հիշեցնենք, որ մայիսի 28-ին, Գայանյանց տոնի առիթով մատուցված Ս. Պատարագի և Հանրապետական մաղթանքի ավարտից հետո Ամենայն Հայոց Կաթողիկոսը, հոգևոր դասի ուղեկցությամբ, այցելել է Սարդարապատի հուշահամալիր: Հայոց Հայրապետը և հոգևոր դասը հանդիպել են հուշահամալիրի տարածք մուտք գործելու արգելքի, ապա՝ մի քանի անգամ հաղթահարելով ոստիկանական ուժերի պատնեշը՝ հուշակոթողի առջև ծաղիկներ խոնարհեցին: Հայոց Հայրապետը հուշակոթողի առջև աղոթք է բարձրացրել առ Աստված՝ մայիսյան հերոսամարտերում նահատակված քաջարի հայորդիների հոգիների հանգստության համար: